काठमाडौँ कात्तिक २ गते ।
बडादसैँका अवसरमा सार्वजनिक यातायातका साधन न्यून सञ्चालन हुने भएपछि सशस्त्र प्रहरी बल नेपालले सर्वसाधारणको आवतजावत सहज बनाउन काठमाडौँ उपत्यकामा दुई वटा निःशुल्क बस सञ्चालन गरेको छ ।
सशस्त्र प्रहरी बल नेपालका सहप्रवक्ता शैलेन्द्र थापाका अनुसार दसैँका बेला यात्रुलाई आवतजावतमा सहजता प्रदान गर्ने उद्देश्यले सोमबारदेखि तीन दिनसम्म निःशुल्क बस सेवा सञ्चालन गरिएको हो ।
दुवै बस बिहान ८ बजेदेखि बेलुका ६ बजेसम्म विभिन्न रुटमा सञ्चालन हुनेछन् ।
सशस्त्र प्रहरी बलको हल्चोकस्थित प्रधान कार्यालयबाट छुट्ने एउटा बसले बालाजु, नयाँ बसपार्क, कोटेश्वर, सातदोबाटो र बल्खु हुँदै विभिन्न स्थानका यात्रुलाई सेवा दिनेछ ।
त्यसैगरी, प्रधान कार्यालयबाटै छुट्ने अर्को बसले सीतापाइला, कलङ्की, बल्खु, कोटेश्वर र नयाँ बसपार्कलगायत क्षेत्रका यात्रुलाई निःशुल्क सेवा प्रदान गर्नेछ ।
दसैँका बेला सार्वजनिक यातायातका साधन कम चल्दा यात्रुले भोग्नुपर्ने असहजतालाई कम गर्न निःशुल्क बस सेवा सञ्चालन गरिएको सशस्त्र प्रहरीले जनाएको छ ।
Discussion about this post