बाँके, मंसिर २ गते ।
हुलाकी सडक निर्माण भएपछि बाँकेका दुर्गम गाउँको आवागमन सहज हुनुका साथै आर्थिक तथा व्यावसायिक गतिविधि बढेका छन् । सडक सञ्जाल विस्तारसँगै राप्ती सोनारीका बैजापुर, बिनौना र फत्तेपुर तथा नरैनापुरका बासिन्दालाई सदरमुकाम नेपालगन्ज आउजाउ गर्न सहज भएको छ ।
हुलाकी सडकले बैजापुरदेखि नरैनापुरको सुइया बघौडासम्मका क्षेत्रलाई नेपालगन्जसँग जोडेको छ । पहिले भारतको बाटो हुँदै नेपालगन्ज पुग्नुपर्ने नरैनापुरका बासिन्दा अहिले आधा घण्टामै सदरमुकाम पुग्न सक्ने स्थानीय अगुवा सोहनलाल यादवले बताए ।
“पहिले भारतको बाटो हुँदै नेपालगन्ज पुग्नुपथ्र्यो, अहिले आधा घण्टामै पुगिन्छ,” उनले भने, “हुलाकी सडक नरैनापुरवासीका लागि जीवनरेखा बनेको छ ।”
बाँकेमा राप्ती सोनारीको फत्तेपुरस्थित कुण्डादेखि बैजापुरको नारायणपुरसम्म २१ किलोमिटर, नेपालगन्ज–गुलरिया सडकखण्डको २८ किलोमिटर र पुष्पलाल चोकदेखि पूर्वतर्फ १० किलोमिटर हुलाकी सडक निर्माण भएको छ ।
सडक बनेपछि राप्ती नदीपारिका गाउँमा व्यापार व्यवसाय, घरेलु तथा साना उद्योग फस्टाउन थालेको राप्ती सोनारी गाउँपालिका–३ का वडाध्यक्ष मीनकुमार चौधरीले बताए । “सडक बनेपछि स्थानीयले विकासको अनुभूति गरेका छन् । व्यावसायिक कारोबार बढेको छ,” उनले भने ।
सडकले धार्मिक तथा पर्यटकीयस्थलमा पनि चहलपहल बढाएको छ । बैजापुरको भुवरभवानी मन्दिर, बाबा बर्फानी, बिनौनाको धुमैया उद्यान र नवनिर्मित राप्ती पुलमा घुम्न जाने आन्तरिक पर्यटकको सङ्ख्या बढेको चौधरीले बताए ।
हुलाकी सडकसँगै कुण्डादेखि नारायणपुर हुँदै अगैयामा पूर्व–पश्चिम राजमार्ग जोड्ने सडक विस्तार भएपछि सवारी आवागमनसमेत बढेको भुवरभवानी माध्यमिक विद्यालयका प्राचार्य चेतबहादुर बिष्टले बताए । नेपालगन्जबाट कोहलपुर हुँदै अगैया पुग्ने सडकभन्दा यो मार्ग छोटो पर्ने भएकाले सवारी साधनले प्रयोग गर्न थालेको उनको भनाइ छ ।
सडक तथा अन्य पूर्वाधार निर्माणले राप्ती सोनारीका बासिन्दाको आर्थिक र सामाजिक जीवनमा परिवर्तन ल्याएको स्थानीय अगुवा जमानसिंह वलीले बताए ।










Discussion about this post