जावेद अन्सारी बाँके चैत २२ गते । प्रदेश ५ का सामाजिक विकास मन्त्री सुदर्शन वरालले शनिबार बाँकेमा व्यवस्त रहनुभएको छ । उहाँले आज भेरी अस्पताल,खजुरा क्यान्सर अस्पतालमा सन्चालनमा रहेको आइसोलेशन र जमूनाह नाकामा रहेको क्वारेन्टाइनको अनुगमन गर्नुभएको हो ।
भेरी अस्पतालमा कोरोना भाइरस परिक्षण गर्ने स्वास्थ्य उपकरण पोर्टेबल आरटी पिसिआर राखीने भएपनि त्यसको पुर्वतयारीका लागि मन्त्री बरालले अनुगमन गर्नुभएको छ। पिसिआर मेसिन राख्ने ठाउँको अनुगमन गर्दै मन्त्री बरालले अस्पताल र मेसिनका बारेमा जानकारी लिनुभएको थियो । मेसिनका बारे जानकारी दिदै भेरी अस्पतालका निमित्त मेडिकल सुपरिटेन्डेन्ट डाक्टर प्रकाश थापाले द्रुत गतिमा काम भइरहेको र अबको एक हप्ता भित्रमा पिसिआर मेसिनबाट काम शुरु गर्ने गरि तयारी गरीएको बताउनुभयो ।
कोरोना भाइरस परिक्षण गर्ने स्वास्थ्य उपकरण पिसिआर मेसिन खरीद र स्वास्थ्य सामाग्री लगायतका बस्तुहरु आपूर्ति गर्नकालागि कोटेशन माग गर्दै तीन दिनको सुचना प्रकाशित गरिएको र तीनवटा कम्पनीको कोटेशन प्राप्त भएको डाक्टर थापाले बताउनुभयो ।
भेरी अस्पतालमा कोरोना परिक्षण गर्ने पिसिआर मेसिन खरीद तथा जडानका लागि प्रदेश सरकारले आफै खर्च बेहोर्ने निर्णय गरिसकेको छ । मन्त्री वरालसँगै प्रदेश सांसद कृष्णा केसी ‘नमुना’, प्रमुख जिल्ला अधिकारी कुमार बहादुर खड्का, नेपालगंज उपमहानगरपालिका उप प्रमुख उमा थापा मगर, खजुरा गाँउ पालिका अध्यक्ष किस्मत कुमार कक्षपति, बाँके प्रहरी प्रमुख बीरबहादुर ओली लगायतले भेरी अस्पताल र खजुरा क्यान्सर अस्पतालको तयारी र ब्यवस्थापनको अनुगमन गर्नुभएको हो । उपमेयर उमा थापामगरले कोरोना संक्रमण विरुद्ध अहोरात्र खटिएर काम गर्दै आउनुभएको छ । मेयरको भूमिकाकै रुपमा उपमेयरले काम गरेपछि थापाको प्रशंसा भइरहेको छ ।
Discussion about this post