बैशाख ९ गते । केही समय तिब्रता दिएपनि सुदूरपश्चिम प्रदेशमा कोरोना भाइरस संक्रमणको परीक्षण एकाएक सुस्ताएको छ । सुरुमा उपकरण अभाव देखाएर परीक्षण वेवास्ता गरिएको सुदूरपश्चिममा पाँचजना संक्रमित भेटिएपछि परीक्षण निकै बढेको थियो । तर अहिले स्वास्थ्यकर्मीको अभाव देखाई नमूना संकलन र परीक्षण दुवै घटेको छ । करिव डेढ लाखलाई परीक्षणको दायरामा ल्याइनु पर्नेमा अहिलेसम्म ८ हजार ८ सय ५४ जनाको नमूना संकलन र ८ हजार ९४ जनाको मात्रै परीक्षण गरिएको छ । सरकारले सुदूरपश्चिमलाई प्राथमिकता दिएर थप ३३ जना चिकित्सक पठाएपनि नमूना संकलनका लागि ल्याव टेक्निसियनको अभाव हुँदा नमूना संकलन र परीक्षण प्रभावित भएको सामाजिक विकास मन्त्रालयका स्वास्थ्य महाशाखा प्रमुख डाक्टर नरेन्द्रसिंह कार्कीले बताउनुभयो । प्रदेशका ९ जिल्लामा मात्रै ४८ जना स्वास्थ्यकर्मीलाई नमूना संकलन र परीक्षणका लागि खटाइएको छ । उनीहरु अधिकांश सदरमुकाम बाहिर गएकै छैनन् । स्वास्थ्य महाशाखा प्रमुख कार्कीले ल्याव टेक्निसियन थप गरेर नमूना संकलन र परीक्षणलाई बढाउने गरी तयारी भइरहेको जानकारी दिनुभयो । कोरोना भाइरस रोकथाम सम्वन्धि उच्च स्तरीय समन्वय समिति अन्तर्गतको आपतकालिन कार्य सन्चालन केन्द्रले बैशाख ४ मा चैत लागेयता विदेशबाट आएका सबैको द्रूत परीक्षण गर्ने निर्णय गरेको थियो । तर सुदूरपश्चिममा भारतबाट आएका मध्ये अधिकांश क्वारेन्टिन बाहिरै छन् । उनीहरु कहाँ बसेका छन त्यसको समेत खोजि नगरिंदा सुदूरपश्चिममा कोरोनाको उच्च जोखिम कायमै छ ।
Discussion about this post