काठमाडौं जेठ २८ गते ।
ग्रेटर नेपाल राष्ट्रवादी मोर्चाले इण्डिया सरकारले गोर्खा सेनालाई छिमेकी चीन र मित्र राष्ट्र पाकिस्तान तथा बंगलादेशलगायतविरुद्ध प्रयोग गर्न नदिन आग्रह गरेको छ ।
मोर्चाले छिमेकी तथा मित्रराष्ट्रहरुविरुद्ध नेपाली युवाहरुलाई प्रयोग गर्न रोक्न नेपाल सरकारले पहल गर्न माग गरेको हो । मंगलबार सिंहदरवारस्थित परराष्ट्र मन्त्रालयमा ज्ञापन पत्र बुझाउन मोर्चाका अध्यक्ष फणीन्द्र नेपाल र कोषाध्यक्ष नविना खड्का पुगेका थिए ।
परराष्ट्र मन्त्री प्रदीप ज्ञवालीलाई बुझाइएको ज्ञापन पत्रमा इन्डियाली गोर्खा सेनासम्बन्धी नेपाल, बेलायत र इन्डियाबीच सन् १९४७ नोभेम्बर ९ मा भएको त्रिपक्षीय सन्धि रद्द गर्न र नेपालका छिमेकी तथा मित्रराष्ट्र चीन र पाकिस्तानविरुद्ध गोर्खा सैनिकको प्रयोग रोक्न इन्डियासँग कुटनीतिक संवाद गर्न माग गरिएको छ ।
ज्ञापन पत्रमा इन्डियाले शत्रु ठानेका राष्ट्रहरू नेपालका मित्र भएको हुँदा ती मित्रराष्ट्रविरुद्ध नेपाली नागरिकहरु सहभागी भएको गोर्खा सैनिक प्रयोग गर्नु गलत हो भन्दै युद्धमा मारिएका गोर्खा सैनिकको लास घरपरिवारलाई जिम्मा नलगाउनु अमानवीय भएको कुरा ज्ञापनपत्रमा उठाइएको छ ।
ज्ञापनपत्रको बोधार्थ चीन, पाकिस्तान, श्रीलंका र बंगलादेशका विदेश मामिलासम्बन्धी मन्त्रीलाई पनि दिइएको मोर्चाले जनाएको छ ।
Discussion about this post