बाँके असोज ३० गते ।
बाँकेको ट्राफिक व्यवस्थापन अस्तव्यस्त देखिएको छ । कोरोना महामारीकाबीचमा पनि बाँके जिल्लामा रहेको ट्राफिक प्रहरीले त्यस्को व्यवस्थापन गर्न सकेको छैन् ।
नेपालगन्जको त्रिभुवन चोकदेखि त्रिवेणीमोडसम्म, विपि चोकदेखि त्रिभुवन चोक, घरबारी टोललगायतका क्षेत्रमा जाम नै हुने गरेको छ । ट्राफिक प्रहरीमा बाँकेले नयाँ नेतृत्व पाएको हप्तादिन पुगिसकेको छ ।
पत्रकार सम्मेलनमा ट्राफिक व्यवस्थापनको प्रतिबद्धता जनाएपनि शहरी क्षेत्रमा ट्राफिक व्यवस्थापन शुन्य देखिएको छ । अटो रिक्सा, मोटरसाइकल र चार पांग्रे सवारी साधनलाई व्यवस्थापन गर्न नसक्दा ट्राफिक व्यवस्थापन फितलो देखिएको छ ।
चाडपर्व भित्रिएसँगै किनमेलका लागि मानिसहरु ग्रामीण क्षेत्रबाट नेपालगन्ज, कोहलपुरलगायतका क्षेत्रमा ओइरिएका छन् । यसले नेपालगन्जमा मानिसहरुको भीडभाड बढाएको छ । त्रिभुवन चोकदेखि त्रिवेणीमोड, घरबारीटोल, न्यूरोडक्षेत्रमा ठेलमठेल भीड हुँदा पनि त्यहाँ ट्राफिक प्रहरीको उपस्थिति नै देखिएको छैन् ।
ट्राफिकको उपस्थिति नहुँदा एकातिर ट्राफिक जामको समस्या भइरहेको छ भने अर्को तर्फ सवारी दुर्घटनाको जोखिम पनि बढाएको छ । त्रिभुवन चोक र त्रिवेणीमोडमा नेपाल प्रहरी खटाएपनि उनीहरुले ट्राफिक व्यवस्थापनमा खासै भूमिका निभाएका छैनन् । उनीहरुले ट्राफिक व्यवस्थापनको काम ट्राफिक प्रहरीको भएको भन्दै पन्छिने गरेका छन् ।
Discussion about this post