बाँके पुस २५ गते ।
जिल्ला ट्राफिक कार्यालय बाँकेले दुई जना हवल्दारको काज फिर्ता गरेको छ भने अर्का हवल्दारलाई अस्थायी पोष्टको जिम्मेवारीबाट हटाएको छ । कार्यालय प्रमुखको नाम लिएर अस्थायी पोष्टबाटै महिनावरी संकलन गरेको समाचार सार्वजनिक भएपछि ट्राफिकको जिल्ला कमाण्ड सम्हालेका राजु भण्डारीले तत्काल उनीहरुमाथि कारवाही अघि बढाएका हुन् ।
जिल्ला ट्राफिक कार्यालयका हवल्दार लक्ष्मण थापा र अस्थायी ट्राफिक पोष्ट नेपालगन्जका हवल्दार तप्प थापाको काज फिर्ता गरिएको छ भने अस्थायी ट्राफिक पोष्ट फुलटेक्राका इन्चार्ज हवल्दार मोहन सिंहलाई इन्चार्जको जिम्मेवारीबाट हटाएर जिल्ला तानिएको ट्राफिक प्रमुख भण्डारीले बताए । लक्ष्मण थापाले जिल्लामा बसेर पोष्टदेखि टिप्परसम्मबाट असुली गर्ने गरेका थिए । बाँके प्रहरीको उच्च स्रोतले दिएको जानकारी अनुसार, लक्ष्मण विरुद्ध एकजना टिप्परधनीले बेनामी उजुरी समेत दिएका छन् ।
जिल्ला प्रहरी कार्यालयमा पुगेर ती टिप्परधनीले उजुरी दिएका हुन् । उक्त उजुरीमा लक्ष्मणले उनकै भाषामा लाइन (महिनावरी) नमिलाएसम्म टिप्परमाथि चेकजाँच र कारवाही भइरहन्छ भन्ने गरेका थिए । ‘ट्राफिकलाई लाइन नमिलाउँदासम्म टिप्पर चलाउने अवस्थै छैन ती टिप्परधनीले भने–‘ हुक्कहार भएर उजुरी दिएको हुँ ।’ लक्ष्मणको सुर्खेत र तप्तको दरवन्दी जाजरकोट हो । उनीहरुलाई विहीबार साँझ दरबन्दी भएको जिल्लामा रमाना गरिएको छ ।
उनीहरु लामो समयदेखि बाँकेमा बस्दै आएका थिए । बेलायतबाट प्रशारित विएफविएसका संवाददाता प्रियास्मृति ढकाल आफ्नो फ्लोअफ रिपोर्टमा लेख्छन् केही अस्थायी पोष्टको जिम्मेवारीमा रहेकाहरुमाथि पनि ट्राफिकको जिल्ला नेतृत्वले छानविन गरिरहेको छ । उनीहरुले पनि सेटिङमा अवैध असुली गरिरहेको तथ्यहरु फेला परेका छन् । अस्थायी पोष्ट फुलटेक्रामा सिंहको ठाउँमा हवल्दार गगन सुनारलाई खटाइएको छ । भण्डारीले वर्दीको आडमा गलत कदम चाल्ने छुट कसैलाई नभएको बताए । जिल्लाको ट्राफिक व्यवस्थापनमा प्रभावकारी ढंगले काम गरिने भण्डारीको भनाइ छ ।
Discussion about this post