बाँके जेठ १४ गते ।
नेपालगन्जको फुलटेक्रामा सञ्चालनमा रहेको मदरसा फैजाने मदिनामा अध्ययन गर्दै आएका दुई विद्यार्थी एकआपसमा खेल्दा खेल्दै एकको ज्यान गएको छ ।
जिल्ला प्रहरी कार्यालय बाँकेका डिएसपी मधुसूदन न्यौपानेले दिएको जानकारी अनुसार सो मदरसामा अध्ययन गर्दै आउनुभएका कास्की रुपाकोट–६ का १६ वर्षीय जामुदिन मियाँको छातीमा चक्कु रोपिएर गम्भीर घाइते भएका उहाँको उपचारको क्रममा ज्यान गएको हो ।
घटना गत जेठ १२ गते बेलुका ५ बजे भएपनि आजमात्रै सार्वजनिक भएको हो । घटना अनुसार मृतक मियाँ र सिराह मिर्चैयाका १२ वर्षीय मोहम्मद आशिक एक आपसमा खेल्दै गर्दा आशिकले समातेको चक्कु मियाँको देब्रे छातिमा मुटुमै रोपिन गई गम्भीर घाइते हुनुभएको थियो ।
प्रहरीका अनुसार मदरसाले उपलब्ध गराएको सिसिटिभी फुटेजमा दुबैले छातिले एक अर्कालाई धकेला धकेल गर्दै गर्दा मियाँलाई आशिकले देब्रे छातिमा चक्कु रोपेको देखिएको छ ।
खेल्दै गरेका विद्यार्थीका हातमा चक्कु कसरी पुग्यो वा पहिला नै योजनाबद्ध भएको घटना हो प्रहरीले अनुसंन्धानकै क्रममा रहेकोले सो बारेमा खुलाएको छैन ।
भने मदरसाको तर्फबाट पनि घटनाको बारेमा जानकारी गराईएको छैन् । घाइते अवस्थामा उपचारको लागि भारतको लखनउ पुराईएका मियाको जेठ १३ गते राती १० बजे उपचारको क्रममा मृत्यु भएको बताईएको छ ।
घटनामा संलग्न रहेका आशिक प्रहरी नियन्त्रणमा रहेको र मृतकको शव भारतको लखनउबाट नेपालगन्ज ल्याई र भेरी अस्पतालमा पोष्टमार्टमको लागि राखिएको डिएसपी न्यौपानेले बताउनुभयो ।
Discussion about this post