बाँके साउन ८ गते ।
बाँके खजुरा गाउँपालिका मानव बेचविखनको उच्च जोखिममा रहेको पाइएको छ । मानव बेचविखनबाट पीडित तथा प्रभावितहरुको सहयोगका लागि आज खजुरामा आयोजित वार्षिक सार्वजनिक कार्यक्रममा खजुरा उच्च जोखिममा रहेको बताइएको हो ।
खजुरामा अहिलेसम्म १७ जना हराइरहेको पाइएको खजुरा गाउँपालिका महिला बालबालिका शाखा प्रमुख शुसिला न्यौपानेले बताउनुभयो । माइती नेपाल नेपालगन्जका संयोजक केशव कोइरालाले बाँकेमा १३१ जनाको खोजतलासको लागि निवेदन परेको बताउनुभयो ।
त्यसमा ४९ जना फेला परेको र अन्य सम्पर्क हुन नसकेको पाइएको छ । ११ जनालाई भने उद्धार गरिएको माइती नेपाल नेपालगन्जले जनाएको छ । जसमा १८ वर्ष माथिका ४ जना, १८ वर्ष मुनिका बालिका ३ र बालक २ रहेका छन ।
बाँकेका भने ५ जना रहेका छन । बैजनाथका २, कोहलपुर, खजुरा र नेपालगन्जका एकएक जना रहेको कोइरालाले बताउनुभयो । कार्यक्रममा बोल्दै खजुरा गाउँपालिकाका अध्यक्ष डम्बर बहादुर विकले मानव वेचविखनको परिदृश्य हेर्दा चिन्ताजनक रहेको बताउनुभयो ।
पालिकाले चेतना स्तर बढाउन सरोकारवालासंँग समन्वय गरि कार्यक्रम संचालन गर्ने, खोजतलासलाई तिव्रता दिने, आवासिय विद्यालयहरुलाई उद्धार गरिएका बालबालिका राख्ने बातावरण मिलाउने, रोजगारीको पहिचान गरि रोजगार दिने काम पनि आगामी दिनमा संचालन गर्ने उल्लेख गर्नुभयो ।
Discussion about this post