बाँके मंसिर ४ गते ।
उदाउँदो सूर्यको पूजा आराधनासहित अर्घ्य दिएर यस वर्षको छठ पर्वको समापन गरिएको छ । हिजो अस्ताउँदो सूर्यको पूजाआराधना गरी अर्घ्य दिएर राति जाग्राम बसेका व्रतालुहरुले आज उदाउँदो सूर्यलाई अर्घ्य दिएर छठ पर्वको समापन गरेका हुन् ।
नेपालगन्जको बागेश्वरी मन्दिर तलाउमा अर्घ्य दिनेको विहान भीड लागेको थियो । बागेश्वरी तलाउलाई बेहुलि झै सिंगारिएको थियो । अर्घ्य दिन नेपालगन्जका विभिन्न ठाउँबाट बढी मात्रामा महिलाहरु सहभागी भएका थिए । व्रत नबसेकाहरुले पनि उदाउँदो सूर्यको पूजा गर्ने चलन छ ।
सूर्यको आराधना गरेर मनाइने यो पर्व लक्ष्मीपूजाको चार दिनपछि अर्थात् कार्तिक शुक्ल पक्षको चौथी तिथिका दिनदेखि विधिवत् रूपमा शुरु हुन्छ । सत्य र अहिंसाप्रति मानवको रुचि बढाउने र सबै जीवप्रति सहानुभूति राख्न अभिप्रेरित गर्ने पर्वका रुपमा मनाउने छठ पर्वलाई बाँकेमा बस्ने मधेशी हिन्दु समुदायले बढी प्राथमिकता दिने गरेका छन्। छठ पर्वलाई निकै कठिन पर्व मानिन्छ ।
सूर्य र जलको शक्ति तथा महत्त्व झल्काउने यस पर्वमा सफा र चोखो हुनुपर्ने तथा शुद्ध खाने कुरा खानुपर्ने मान्यता छ । नेपालमा पहिला तराई क्षेत्रमा सीमित यो पर्व केही वर्षदेखि बाँकेका मधेशी तथा विभिन्न पहाडी जिल्लामा पनि मनाउन थालिएको छ ।
तस्वीरमा हेरौं
Discussion about this post