बाँके मंसिर २५ गते ।
बाँके प्रहरीले भारतबाट अवैध रुपमा भित्रिएका मालसामान धमाधम बरामद गर्न थालेको छ । सशस्त्र प्रहरीसँग मिलेर तस्करले नेपाल भित्र्याएका मालसामान जिल्ला प्रहरी कार्यालय बाँकेको टोलीले धमाधम बरामद गरेको हो ।
मंसिर २१ गते अवैध रुपमा भित्रिएका २०८ बोरी चामल र चार वटा राँगा बरामद गरेको प्रहरीले मंसिर २५ गते पाँच पेटी टायल र उक्त टायल ल्याउन प्रयोग भएको मोटरसाइकल बरामद गरेको बाँके प्रहरी प्रवक्ता डिएसपी नारायण डाँगीले जानकारी दिए । उक्त सामान नेपालगन्ज उपमहानगरपालिका १० बाट बरामद गरिएको उनले बताए ।
यसैगरी, सशस्त्र प्रहरीकै मिलोमतोमा भित्र्याइएको तीन सय किलोग्रामको अवैध कुखुरा बाँके प्रहरीले बरामद गरेको थियो । उक्त कुखुरा ल्याउन प्रयोग भएको तीन वटा मोटरसाइकल पनि बरामद गरेको थियो ।
तीन दिनको अवधिमा बरामद भएको चार वटा मोटरसाइकल र टायल आवश्यक कारवाहीका लागि नेपालगन्ज भन्सार कार्यालयमा बुझाइएको डिएसपी डाँगीले जानकारी दिए ।
भारतबाट अवैध रुपमा भित्र्याइएको मालासामान बाँके प्रहरीले दिनदिनै बरामद गरेपछि सशस्त्र प्रहरीको नियत उदांगो भएको छ । नेपाल–भारत सीमाको हरेक पाँच सय मिटर दूरीमा सशस्त्र प्रहरीले ड्यूटी गरे पनि अवैध रुपमा सामान भित्रिनुले सशस्त्र प्रहरी तरस्करसँग लाइने लिएको प्रष्ट भएको सर्वसाधारण बताउँछन् ।
सीमामा हुने अवैध सामान नियन्त्रण गर्न खटिएको सशस्त्र प्रहरी तस्करी नियन्त्रण गर्नुभन्दा कमाउ धन्धामा लागेपछि अवैध सामान नियन्त्रणमा आउन नसकेको बताइन्छ । नाका खटिएका सशस्त्र प्रहरीले सामान हेरेर तस्करसँग रुपैयाँ लिने गरेको स्वयम तस्कर बताउँछन् । ‘सशस्त्र प्रहरीले एक जना तस्करसँग एक पटकमा एक हजारदेखि दुई हजार रुपैयाँ लिन्छन्,’ एक जना तस्करले नाम नबताउने सर्तमा भने, ‘सशस्त्र प्रहरीको सहयोग विना भारतबाट सामान भित्र्याउन चिउरामा फलाम चपाए सरह हो ।’
सशस्त्र प्रहरीले मुख्य नाकामा कडाई गरेको नाटक गरेर सर्वसाधारणलाई त्रसाउने गरेको छ ।
उसले छोरी कुटेर बुहारी त्रसाउने गरेको सर्वसाधारण बताउँछन् । सर्वसाधारणलाई कडाई गरेको देखाएर सशस्त्र प्रहरीले तस्करसँग मोटो रकम लिएको छ,’ एक प्रत्यक्षर्शीले भने, ‘सशस्त्रले हात्तीको देखाउने दाँत र चपाउने दाँत फरक भए जस्तै बाहिर एउटा र भित्र अर्को काम गरिरहेको छ ।’
Discussion about this post