बाँक चैत २२ गते ।
नेपालगन्ज उपमहानगरपालिका १६ जयसपुरमा दुई पक्ष वीच झडप भएको छ । जयसपुरस्थित मनि चेन्जरको अगाडी रहेको निमको हांगा भाँचेको विषयमा सामान्य विवादले उग्ररुप लिएपछि दुई पक्ष वीच झडप भएको हो ।
झडपमा परि दुवै पक्षका एक आधा दर्जन बढि घाइते भएको प्रहरीले जनाएको छ । अन्सारी पक्ष र कुरैसी पक्ष भएको झडपमा परि कुरैसी पक्षका चार जना सख्त घाइते भएका छन् । उनीहरुको नेपालगन्ज मेडिकल कलेज शिक्षण अस्पताल नेपालगन्जमा उपचार भइरहेको छ ।
झडपमा महबुब कुरैसी, मकबुल कुरैसी, महमुद कुरैसी र सैफ कुरैसी घाइते भएका छन् । नेपालगन्ज मेडिकल कलेज शिक्षण अस्पतालमा उपचाररत महमुद कुरैसीले सराफत अन्सारी, साविर अन्सारी, जाहिद अन्सारी र उनका भतिजाले मुक्का लाठी र भाटा प्रहार गरेको आरोप लगाए ।
उनले सराफतको नेतृत्वमा आफूहरुमाथि आक्रमण भएको दावी गरेका छन् । अन्सारी परिवारका एक सदस्यले निमको हांगा भाँचेको बहाना मात्र भएको कुरैसी परिवारले स्पष्ट पारेको छ । ‘सामान्य विवादलाई ठूलो बनाएर हामीमाथि सांघातिक आक्रमण भयो,’ महबुबले भने, ‘निमको हांगा भाँचेको बहाना मात्र हो । आक्रमण सुनियोजित तरिकाले भएको छ ।’
त्यसपछि उत्पन्न विवादले उग्ररुप लिँदै झडपको स्थिति सिर्जना भएको हो । उक्त झडप पछि झण्डै तीन सय सर्वसाधारणको जमघट भएको प्रहरीले जनाएको छ । उक्त स्थानमा प्रहरी समेत जान हिच्किचाएको स्थानीयले बताए ।
(भिडियो हेरौं)
Discussion about this post