बाँके बैशाख २७ गते ।
नेपालगन्ज उपमहानगरपालिका २१, विर्ताका मोहम्मद अरबी खाँको घरमा चुल्हो नबलेको डेढ महिना भएको छ । गत चैत १८ गते राती उनको हत्या भएदेखि उनको घरमा चुल्हो बल्न छाडेको हो ।
हत्या भएको डेढ महिना वित्दासमेत हत्यारा फेला नपरेपछि परिवारका सदस्य त्रसित छन् नै कामकाज समेत लथालिङ्ग भएको छ । खेतबारीमा काम गर्न जान समेत नसकेको मृतक अरबी खाँका काका अब्दुल रहमान खाँले बताए ।
१८ चैतको राती विर्ताका २२ वर्षिय मोहम्मद अरबी खाँको घाँटी रेटेर हत्या भएको थियो । उनको शव १९ चैत विहान घरदेखि एक किलोमिटर पूर्व इट्टा भट्टा नजिक फेला परेको थियो । घाँटी र पेटमा गम्भिर चोट लागेको अवस्थामा फेला परेका खाँको साथमा रहेको मोवाइल सेट समेत गायव भएकोले सुनियोजित तरिकाले उनको हत्या गरिएको परिवारले आशंका गरेको छ ।
हत्यारा फेला नपरेपछि परिवारका सदस्यको आँशु रोकिएको छैन । मनमा शान्ति छैन । रातमा चैनसँग निदाउन र राम्रोसँग खानसमेत सकेका छैनन् ।
अनुसन्धानका लागि जिल्ला प्रहरी कार्यालय बाँकेको टोलीसँगै सिआइवीको टोलीले समेत अनुसन्धान गरिरहेको छ, तर प्रहरीले अहिलेसम्म अपराधि फेला पार्न नसकेको भन्दै पीडित परिवारले दुख ब्यक्त गरेका छन् । हत्याराको खोजीका लागि मृतक अरबी खाँका परिवार हरेक दिन जिल्ला प्रहरी कार्यालय पुग्ने गरेका छन् ।
हत्याराले लगाएको लुगा गहुँबारीमा फेला परेकोले पहिचान भइसकेको परिवारजनले दावी गरेका छन् । उनीहरुले प्रहरीलाई छक्याउने ब्यक्ति नै अरबी खाँको हत्याका प्रमुख नाइके भएको परिवारजनको दावी छ ।
प्रहरीले आशंकाको आधारमा तीन जनालाई नियन्त्रणमा लिएर अनुसन्धान गरेको थियो । ति मध्ये दुई जना घर फर्किएका छन् । एक जनालाई चौथो पटक नियन्त्रणमा लिएर अनुसन्धान गरिरहेको छ । प्रहरी हिरासतमा रहेका ब्यक्ति नै हत्याका मुख्य योजनाकार रहेको अरबीका आमा राबिया खाँले बताइन् ।
२२ वर्षिय छोरा अरबी खाँको हत्या भएको दिनदेखि आमा राबियाको आँखा सुकेको छैन । खानासमेत खान छाडेकी उनी स्वास्थ्य विग्रदै गएको छ । उनी दुब्लिएर हिड्न नसक्ने भएकी छन् । प्रहरीले हत्यारा पत्ता नलगाए त्यसको परिणाम प्रहरी प्रशासनले भोग्न पर्ने चेतावनी परिवारका सदस्यले दिएका छन् ।
Discussion about this post