बाँके असार २२ गते ।
राप्ती नदिमा पानीको सतह खतराको सतहभन्दा माथि आएको छ । जल तथा मौसम विज्ञान विभाग जल मापन कार्यालय कुसुमका अनुसार राप्ती नदिको कुसुममा पानीको सतह ८ दशमलव ०३ मिलिमिटर पुगेको छ ।
बर्षात जारी रहेकोले पानीको सतह बढ्ने क्रम जारी रहेको जल मापन केन्द्रले जनाएको छ । कुसुमस्थित राप्ती नदिमा पानीको सतह ६ दशमलव ५ मिलिमिटर पुगे खतरा मानिन्छ ।
उक्त बाढीले राप्तीसोनारी गाउँपालिकाको बैजापुर, कचनापुर, बिनौना, टेपरी, फत्तेपुर, पिप्रहवा, डुडुवा गाउँपालिकाको होलिया, चौफेरी, पिप्रहवा, खडैचा लगायतका क्षेत्र डुवानमा पर्ने खतरा रहन्छ ।
कुसुमस्थित बाढी होलिया, पिप्रहवा र खडैचा पुग्न चार घण्टा लाग्छ । पानीको सतह बढ्दो क्रममा रहेकाले नदी तटीय क्षेत्रका बासिन्दालाई सतर्कता अपनाउँदै सुरक्षित स्थानमा रहन बाँके प्रशासनले आग्रह गरेको छ ।
बाढी बढेपछि डुडुवा गाउँपालिका १ चौफेरीका ५० जनालाई सुरक्षित स्थानमा सारिएको आपतकालीन कार्यसञ्चालन केन्द्रका सूचना ब्यवस्थापन अधिकृत रुपन ज्ञवालीले जानकारी दिए ।
उता, राप्ती नदिमा आएको उर्लदो बाढीको प्रवाह नगरि डुडुवा गाउँपालिका ४ र ५ का सर्वसाधारण बाढीले बगाएर ल्याएको दाउरा झिकिरहेका छन् । बाढीले बगाएर ल्याएको दाउरा झिक्न बालबालिका, बृद्धबृद्धा समेत राप्ती नदिस्थित सिधनियाघाट पुगेका छन् ।
दाउरा झिक्न गएका स्थानीयलाई बाढीले बगाउने खतरा रहेकोले त्यहाँ सशस्त्र प्रहरी र नेपाल प्रहरीको टोली परिचालन भएका छन् । प्रहरीले जोखिम मोलेर बाढीबाट दाउरा नझिक्न आग्रह गरे पनि सर्वसाधारणले नमानेको प्रहरीको भनाई छ । 
Discussion about this post