बाँके असार २५ गते ।
बाँकेमा २५ प्रतिशत रोपाइँ भएको छ । पानीको अभावले असार १५ सम्म दुई प्रतिशत मात्र रोपाइँ भएको जिल्लामा केही दिनको निरन्तर वर्षाले २५ प्रतिशत रोपाइँ सफल भएको कृषि ज्ञान केन्द्र बाँकेका प्रमुख सकिल अहमद खाँले जानकारी दिए ।
उनले भने; यो साता जिल्लामा पर्याप्त वर्षा भएकाले आठ वटै पालिकामा रोपाइँ तीव्र गतिले भइरहेको छ ।
आगामी दस दिनभित्र ८० देखि ९० प्रतिशत रोपाइँ सम्पन्न हुने अनुमान गरिएको खाँले बताए । त्यसपछि बाँकी रहेको रोपाइँ छिटपुट रूपमा केही दिनसम्म भइरहने पनि कृषि ज्ञान केन्द्र बाँकेले जनाएको छ ।
असार १५ गते धान दिवस मनारइरहँदासम्म जिल्लामा पानी नपरेकोले अधिकांश किसानले बिउँ समेत राख्न पाएका थिएनन् । सोही कारणले सो अवधिसम्म दुई प्रतिशत मात्र रोपाइँ भएको थियो । पानी अभावले ढिलै सुरु भएपनि जिल्लामा धान उत्पादन हुने सब खेतमा रोपाइँ हुने र उत्पादन समेत राम्रो हुने आशा गरिएको कृषि ज्ञान केन्द्रका प्रमुख खाँले बताए ।
समयमा रोपाइँ सुरु गर्न नसक्दा चिन्तामा परेका बाँके डुडुवा–५ का किसान रमेश यादवले आफूले हालसम्म २५ प्रतिशत भन्दा बढी रोपाइँ गरिसकेको बताउँदै पछिल्लो समयको वर्षाले उत्पादन राम्रो हुने आशा बढाएको बताए । खजुरा–३ का किसान रामु थापाले ढिलै भएपनि धेरै राम्रो वर्षा भएकाले सोचे भन्दा राम्रो रोपाइँ गरेको बताए ।
कृषि ज्ञान केन्द्र बाँकेले पनि यस वर्ष ढिला गरी रोपाइँ सुरु भएपनि बाढी र डुबान भएन भने विगत भन्दा राम्रो उत्पादन हुने सम्भावना रहेको जनाएको छ ।
बाँकेमा धान रोपाइँ हुने कूल ३६ हजार ५०० हेक्टर खेतीयोग्य जग्गा छ । गत वर्ष पनि सोही क्षेत्रफल खेतमा धानखेती गरिएको थियो । अहिले पनि सोही क्षेत्रफलमा धानखेतीका लागि रोपाइँ भइरहेको छ ।
Discussion about this post