बाँके साउन ११ गते ।
नेपालगन्ज उपमहानगरपालिका वडा नं.२ बागेश्वरी मन्दिर नजिकैबाट प्रहरीले भन्सार छलिको साढे ६ लाख बढीको अवैध सामान बरामद गर्यो । बच्चाका सुट, टिसर्ट, काचो कपडा लगायतको ६ लाख ५७ हजार ५० रुपैयाँ बराबरको अवैध सामान बुधवार प्रहरीले बरामद गरेको जानकारी गराएको छ ।
उक्त सामान थप कारवाहीका लागि भन्सार कार्यालयमा बुझाइएको छ । भन्सार छलिका सामानहरु यसरी बरामद हुनु राम्रो कुरा हो ।
यसले अवैध तस्करी नियन्त्रणसँगै राजश्वलाई समेत सकारात्मक प्रभाव पार्छ । प्रहरीले भन्सार छलिको अवैध सामानहरु नेपाल प्रवेश गर्नै दिनु हुदैन । तर पनि बाँकेमा यो श्रृंखला रोकिन सकेको छैन । प्रहरीले विशेष सूचनाका आधार भन्दै घरबाटै सामान अवैध करार गराएर बरामद भन्ने गरेको छ । प्रहरीको यो छापामार शैलीप्रति भने व्यापारीहरुले चित्त बुझाएका छैनन् ।
एकजना व्यापारीले भने–‘प्रहरीलाई लाइन नदिने हो भने घरभित्रको वैध सामानलाई समेत अवैध भनेर बरामद गर्ने स्थिति सिर्जना भएको छ ।’ पसल वा घरभित्र छापा मार्दा स्थानीय जनप्रतिनिधि, व्यापारीलगायतको रोहवर राखिनुपर्ने भएपनि प्रहरीले वलजफ्ती गर्ने गरेको ती व्यवसायीले बताए ।
घुमुवाले लाइन लिएर भन्सारबाट अवैध सामानहरु भित्रिने गरेको छ । त्यही सामानमा प्रहरीले आफ्नो भाग खोज्ने गरेको छ । भाग नपाए घरभित्रैबाट सामान बरामद गर्ने गरेको छ ।
यहाँसम्मकी घुमुवा र नेपाल प्रहरीका दुवैलाई लाइन दिनुपर्ने अवस्था सिर्जना भएको भुक्तभोकी व्यवसायीहरु बताउँछन् । ‘एक जना व्यापारीले भने यहाँ त त्रिपल लाइन दिनुपर्छ हजुर घुमुवा, नेपाल प्रहरी र सशस्त्र प्रहरी । नत्र त वैध सामानलाई पनि अवैध बनाइदिन्छन् ।’
घुमुवा र चौकी इन्चार्जहरुले तस्करहरुलाई त्रर्साउनलाई मात्रै अवैध सामान बरामद गर्ने गरेको प्रहरीकै अधिकारीहरु बताउँछन् । सामान बरामद हुन थालेपछि तस्करहरु लाइन मिलाउन आउने भएकाले प्रहरी पोष्टका इन्चार्जहरु अवैध सामान बरामद गरेको देखाउन हानथाप गर्ने गरेको ती प्रहरी अधिकारीले बताए ।
त्यसो गरियो भने तस्करहरु लाइन दिन कार्यालयमै आउँछन् । पछिल्लो समय सीमा क्षेत्रका प्रहरी इन्चार्जहरुले तस्करसँगको मिलेमत्तोमा व्यापक अवैध तस्करी गराइरहेको पाइएको छ ।
Discussion about this post