बाँके साउन १८ गते ।
सरकारले राष्ट्रिय परिचयपत्रलाई विभिन्न सेवा सुविधा लिनका लागि पनि अनिवार्य गर्न थालेपछि पछिल्लो समयमा बाँकेमा राष्ट्रिय परिचयपत्र रजिष्ट्रेसन गराउनेहरू ह्वात्तै बढेका छन् । जिल्ला प्रशासन कार्यालय बाँकेले दिएको जानकारी अनुसार जिल्लामा अहिलेसम्म दुई लाख ६६ हजार ७५१ जनाले राष्ट्रिय परिचयपत्रका लागि रजिष्ट्रेसन गराएका छन् ।
ती मध्ये ५४ हजार ३३३ जनाले जिल्ला प्रशासन कार्यालयमै पुगेर परिचयपत्रका लागि रजिस्ट्रेसन गराएको र अन्यले विभिन्न वडाहरूमा रजिस्ट्रेसन गराएको बाँकेका प्रमुख जिल्ला अधिकारी खगेन्द्र प्रसाद रिजालले बताए । उनले परिचय पत्रका लागि रजिस्ट्रेसन गराएर नम्बर लिएर जाने धेरै भएपनि परिचय पत्रको कार्ड लिन आउने भने निकै कम संख्यामा रहेको बताए ।
जिल्ला प्रशासन कार्यालय बाँकेमा तयार भएर आएका ३४ हजार २५१ परिचय पत्रका कार्डमध्ये सात हजार ७४५ कार्ड मात्र सम्बन्धित व्यक्तिहरू लिन आएको प्रजिअ रिजालले बताए । २६ हजार ५०६ वटा कार्ड जिल्ला प्रशासनमा आएपनि सम्बन्धित व्यक्तिहरू लिन नआउँदा वितरण हुन बाँकी रहेको जिल्ला प्रशासन कार्यालय बाँकेले जनाएको छ ।
बाँकेका सहायक प्रमुख जिल्ला अधिकारी जोरासिंह माझीले विभागको निर्देशन अनुसार अहिले प्रशासन कार्यालयबाट राष्ट्रिय परिचयपत्रको कार्ड वितरण स्थगन गरिएको बताए । उनले जिल्ला प्रशासन कार्यालय, कोहलपुर नगरपालिका, बैजनाथ र राप्तीसोनरी गाउँपालिकाका केही वडा, राप्तीसोनारी गाउँपालिका–९ तथा नरैनापुर गापाका वडा नं १, २, ३, ४ र ५ नम्बर वडाका लागि ‘रजिस्ट्रेसन’ को काम भइरहेको बताए ।
सहायक प्रमुख जिल्ला अधिकारी माझीले थपे, “अहिले पनि राष्ट्रिय परिचयपत्रका लागि गाउँगाउँमा धमाधम काम भइरहेको छ ।” जिल्ला प्रशासन कार्यालय बाँकेका अनुसार केही वर्षअघि टोली परिचालन गरेर राष्ट्रिय परिचयपत्र बनाइएकोमा उक्त टोलीले जिल्लामा २० हजारको रजिष्ट्रेसन गरेको थियो ।
पछिल्लो समयमा राष्ट्रिय परिचयपत्र बनाउनेहरूमा नेपालगन्ज उपमहानगरपालिका, कोहलपुर नगरपालिका, बैजनाथ गाउँपालिका, राप्तीसोनारी गाउँपालिका र नरैनापुर गाउँपालिकाका नागरिकहरू बढी भएको जिल्ला प्रशासन कार्यालयमा रहेको राष्ट्रिय परिचयपत्र रजिष्ट्रेसन शाखाले जनाएको छ ।
Discussion about this post