बाँके भदौ ३० गते ।
मानव वन्यजन्तु बिचको द्वन्द्व रोक्न तथा वन्यजन्तुबाट स्थानीयका अन्नबाली जोगाउनका लागि गरिएको तारजालीले बाँकेका विभिन्न सामुदायिक वन उपभोक्ता समूहअन्तर्गतका चार सयभन्दा बढी घरधुरी लाभान्वित भएका छन् । तारजालीले बाँके राष्ट्रिय निकुञ्ज नजिकका विभिन्न सामुदायिक वन उपभोक्ता समूहका वन क्षेत्रभित्र पर्ने कम्दी जैविक मार्ग अन्तर्गतका मानववस्तीहरुका चार सयभन्दा बढी स्थानीय घरधुरी लाभान्वित भएका हुन् ।
गत आर्थिक वर्ष २०८०÷०८१ मा विभिन्न कार्यक्रममार्फत मानव वन्यजन्तुबिच हुने सम्भावित द्वन्द्व रोक्न तथा वन्यजन्तुबाट किसानका अन्नबालीमा हुने क्षतिबाट जोगाउन गरिएको तारजालीबाट बाँके राष्ट्रिय निकुञ्ज नजिक रहेका विभिन्न सामुदायिक वन उपभोक्ता समूहका वन क्षेत्रभित्र पर्ने कम्दी जैविक मार्गअन्तर्गतका मानववस्तीहरुका चार सयभन्दा बढी स्थानीय घरधुरी लाभान्वित भएको शमशेरगञ्ज सब डिभिजन वन कार्यलयका वरिष्ठ वन अधिकृत सुशील सुवेदीले जानकारी दिए ।
मानव वन्यजन्तु बिचको द्वन्द्व रोक्न तथा अन्नबाली जोगाउनका लागि गत आर्थिक वर्षमा बाँके राष्ट्रिय निकुञ्ज नजिक रहेका कम्दी जैविक मार्गअन्तर्गत पर्ने विभिन्न तीनवटा सामुदायिक वनका वनक्षेत्र र नजिकको बस्तीबिच मेष तारजाली जडान गरिएको वरिष्ठ वन अधिकृत सुवेदीले जानकारी दिए । उनका अनुसार तीनवटा सामुदायिक वनका वनक्षेत्र र बस्तीबिच तीन हजार ८५० मिटर लम्बाइ रहेको मेष तारजाली जडान गरिएको हो ।
जसबाट ४६७ स्थानीय घरधुरी प्रत्यक्ष लाभान्वित भएको उनले बताए । मानव वन्यजन्तु बिचको असमझदारी न्यूनीकरणका लागि हरित बार सहितको मेष जाली जडान कार्यक्रमअन्तर्गत राप्तीसोनारी गाउँपालिका वडा नम्बर २ टिकुलीपुरस्थित जनकल्याण सामुदायिक वन उपभोक्ता समूहमा एकीकृत भू–परिधि व्यवस्थापन आयोजना (इलम) सँगको समन्वयमा १५ सय मिटर लामो मेष तारजाली जडान गरिएको छ ।
१८ लाख ७८ हजार ३४० रुपियाँ इलम र ६ लाख ७० हजार २८९ रुपियाँ समूहको गरी कुल २५ लाख ४८ हजार ६२९ रुपियाँको लागतमा उक्त तारजाली निर्माण गरिएको सुवेदीले जानकारी दिए । त्यसैगरी राप्तीसोनारी २ मदुईस्थित अशोक सामुदायिक वन उपभोक्ता समूहमा पनि इलमको सहकार्यमा तारजाली जडान गरिएको छ । अशोकमा १५ सय मीटर लामो मेष जाली जडान गरिएको छ । जसबाट १३२ स्थानीय घरधुरी प्रत्यक्ष लाभान्वित भएका छन् ।
इलमको १२ लाख २० हजार ९७६ रुपियाँ र समुहको नौ लाख ५९ हजार ३३७ गरी कुल २१ लाख ८० हजार ३१३ रुपियाँको लागतमा उक्त तारजाली निर्माण भएको वन अधिकृत सुवेदीको भनाइ छ । राप्तीसोनारी २ कै माथेवासस्थित जनमुखी सामुदायिक वन उपभोक्ता समूहमा भने डिभिजन वन कार्यालयसँगको समन्वयमा तारजाली जडान गरिएको हो । जनमुखीमा ८५० मिटर लामो मेष तारजाली जडान गरिएको छ भने एक सय स्थानीय घरधुरी प्रत्यक्ष लाभान्वित भएका छन् ।
डिभिजन वन कार्यालयको १० लाख ४३ हजार १२० रुपियाँ र समूहको एक लाख चार हजार ३१२ रुपियाँ गरी कुल ११ लाख ४७ हजार ४३२ रुपैयाँमा उक्त तारजाली निर्माण भएको सुवेदीले बताए । उनका अनुसार तारजाली जडानसँगसँगै वातावरणलाई हरित बनाउनुका साथै सामुदायिक वनको आम्दानीसमेत हुने भएका कारण तारजालीको नजिक नजिक कागतीका बिरुवासमेत लगाइएको छ ।
Discussion about this post