लुम्बिनीमा युवा परिषद्का लागि १ करोड बजेट स्वीकृत

लुम्बिनी असोज ५ गते ।
लुम्बिनी प्रदेश युवा परिषद्का लागि विनियोजित १ करोड रुपैयाँ स्वीकृत भएको छ । पुँजीगततर्फ ५९ लाख र कार्यक्रमतर्फ ४१ लाख रूपैयाँको बजेट स्वीकृत भएको हो ।

लुम्बिनी प्रदेशका मुख्यमन्त्री एवं लुम्बिनी प्रदेश युवा परिषद् विकास समितिका अध्यक्ष चेतनारायण आचार्यको अध्यक्षतामा मन्त्रिपरिषद्को कार्यालय देउखुरीमा शुक्रबार बसेको बैठकले चालु आर्थिक वर्ष २०८१/०८२ को लागि प्रदेश युवा परिषद् समितिको प्रस्तावित बजेट तथा कार्यक्रम स्वीकृत गरेको छ ।

बैठकले युवा परिषद् समितिको हाल बुटवलमा रहेको कार्यालय लुम्बिनी प्रदेशको राजधानी क्षेत्रभित्र स्थानान्तरण गर्ने निर्णय गरेको छ । बैठकलाई सम्वोधन गर्दै मुख्यमन्त्री आचार्यले युवाहरुलाई उद्यम, सचेतना तथा साइबर सुरक्षा लगायतका क्षेत्रलाई प्राथमिकतामा राखेर कार्यक्रम केन्द्रित गर्न आग्रह गरे। ‘युवाहरुको समस्याको पहिचान गरेर समाधानका लागि योजना निर्माण गर्न जरुरी छ,’ उनले भने, ‘युवालाई आकर्षित गर्ने, भविश्यप्रति आशा जगाउने गरी काम गर्न जरुरी छ ।

यसै प्रकारका योजनाहरु बनाएर अघि बढ्नुपर्छ ।’ युवा परिषद्ले युवाहरुलाई साइबर सुरक्षा सम्बन्धी तालिम प्रदान गर्ने, सीमान्तकृत समुदायका युवालाई लक्षित गरेर अटो रिक्सा मर्मत तालिम, नमुना युवा संसद्, लागूऔषध तथा दुर्व्यसनीविरुद्ध सचेतना कार्यक्रम, लुम्बिनी प्रदेशमा युवाको अवस्था अध्ययन तथा विश्लेषण गर्ने, युवा पिस कन्फ्रेन्स कार्यक्रम गर्ने र युवा उद्योग वाणिज्य संघसँग सहकार्य तथा छलफल गर्ने कार्ययोजना बनाएको छ ।