बाँके कात्तिक १९ गते ।
नेपालगन्ज-४ बसपार्क बाईपास रोड मानसरोवर दोहोरी साँझ नजिक दुई मोटरसाइकल एक आपसमा ठोक्किँदा एक जनाको मृत्यु भएको छ ।
जिल्ला प्रहरी कार्यालय बाँकेका प्रहरी प्रमुख एसपी तुलबहादुर कार्कीका अनुसार आइतबार राति भएको उक्त दुर्घटनामा नेपालगन्ज-६ डेरा गरी बस्ने २६ वर्षीय अमनकुमार कसौंधन (गुप्ता) को मृत्यु भएको छ, भने नेपालगन्ज-११ बस्ने १८ वर्षीय एहसान शेख गम्भीर घाइते भएका छन् ।
घाइते शेखको उपचार नेपालगन्जस्थित भेरी अस्पतालमा हुन नसकेपछि थप उपचारका लागी लखनऊ लगिएको जिल्ला प्रहरी कार्यालय बाँकेले जनाएको छ ।
प्रहरीका अनुसार नेपालगन्ज उपमहनपालिका(४ बाइपासबाट गणेशपुरतर्फ जाँदै गरेको भे ६ प ८०२ नम्बरको मोटरसाइकल र विपरित दिशाबाट आएको ज ३ प ७१७१ नम्बरको मोटरसाइकल एक आपसमा ठोक्किएको हो ।
सो दुर्घटनामा दुबै मोटरसाइकल चालक गम्भीर घाइते भएको र उपचारका लागि नर्सिङहोम नेपालगन्ज बाँकेमा ल्याइएकोमा चिकित्सकले कसौधनलाई आइतबार राति मृत घोषणा गरेका थिए ।
त्यसैगरी गम्भीर घाइते शेखको मुख, आँखा र शरिरमा भित्री चोट लागेकाले थप उपचारका लागि भारतको लखनऊ लगिएको परिवारको भनाइ उद्धृत गर्दै प्रहरीले जनाएको छ ।
Discussion about this post