बाँके मंसिर २२ गते ।
बाँकेमा सवारी दुर्घटनामा कमी आएको जिल्ला ट्राफिक प्रहरी कार्यालयको तथ्यांकले देखाएको छ । अघिल्लो वर्षको तुलनामा चालू आर्थिक वर्षमा सवारी दुर्घटनामा कमी आएको जिल्ला टाफिक कार्यालय बाँकेका प्रमुख प्रहरी निरीक्षक पुष्करराज पन्तले जानकारी दिए ।
उनका अनुसार, चालू आवको चार महिनामा सवारी दुर्घटनामा परि चार महिलासहित २८ जनाले ज्यान गुमाएका छन् । उनले साउन र भाद्रमा ६–६ जना तथा असोज र कात्तिकमा आठ–आठ जनाले ज्यान गुमाएको बताए । आर्थिक वर्ष ०७९–०८० मा ६० र गत आव ०८०–०८१ मा ६६ जनाको सवारी दुर्घटनामा परि ज्यान गएको प्रहरी निरीक्षक पन्तले बताए । उनले आर्थिक वर्ष ०७९–०८० मा १२४ र गत आव ०८०–०८१ मा १५८ वटा सवारी दुर्घटना भएको जानकारी दिए ।
चालू आवको चार महिनामा ८८ लाख ६४ हजार पाँच सय रुपैयाँ राजस्व संकलन भएको पन्तले बताए । उनले आर्थिक वर्ष ०७९–०८० मा दुई करोड ६१ लाख ९७ हजार र गत आव ०८०–०८१ मा दुई करोड ४४ लाख २७ हजार रुपैयाँ राजस्व संकलन भएको बताए ।
जिल्ला टाफिक प्रहरी कार्यालयको तथ्यांक अनुसार सवैभन्दा बढि मोटरसाइकल कारवाहीबाट राजस्व संकलन भएको छ । मोटरसाइकल कारवाहीबाट चार महिनामा २७ लाख ६४ हजार रुपैयाँ राजस्व संकलन भएको प्रहरी निरीक्षक पन्तले जानकारी दिए ।
Discussion about this post