बाँके पुस १९ गते ।
पाँच दिनदेखि चिसो बढेर चारैतिर हुस्सुले डम्म ढाकेपछि बाँकेसहित पश्चिम तराईका जिल्लामा जनजीवन प्रभावित भएको छ । बिहानैदेखि बाक्लो हुस्सु लाग्नुका साथै सितलहर सुरु भएसँगै चिसो बढेको हो ।
शीतलहरसँगै बढेको चिसोले बाँकेलगायत आसपासका जिल्लाका जनजीवन प्रभावित भएको छ । चिसो र शीतलहरले बाँकेका आठवटै पालिकाको जनजीवन कष्टकर बनेको छ ।
चिसोबाट बच्चा, वृद्ध र विपन्न परिवारहरू बढी प्रभावित भएका छन् । अत्याधिक चिसोको कारण मानिसहरूलाई घर बाहिर निस्कनसमेत मुस्किल परेको छ ।
विद्यालय, क्याम्पसमा विद्यार्थीको उपस्थिति घटेको छ । न्यानो कपडा बिक्रीबाहेक अन्य व्यापार व्यवसायमा मन्दी आउन थालेको नेपालगञ्जका व्यापारी रेवती रमणले बताए । ग्रामीण भेगमा विशेष गरी चिसो छल्न घुर, आगो बालेर तापिरहेका छन् ।
चिसो बढ्दै जाँदा बालबालिका, वृद्धवृद्धा र शारीरिक अवस्था कमजोर रहेका व्यक्तिहरूले स्वास्थ्यमा ख्याल गर्न स्वास्थ्यकर्मीहरुले आग्रह गरेका छन् ।
अहिलेसम्म बाँकेको कुनै पनि स्थानीय तहले आगो बालेर ताप्नका लागि दाउराको व्यवस्था र न्यानो कपडाको प्रबन्ध गरेका छैनन् । चिसोका कारण बाँकेका सबै पालिकाको जनजीवन कष्टकर बनेको छ । चिसोले नेपालगञ्ज, कोहलपुर र खजुरा बजारहरूमा चहलपहल घटेको छ । अत्याधिक जाडोले सवारीसाधनमा यात्रुहरूको चापसमेत घटेको छ ।
Discussion about this post