बाँक चैत २३ गते ।
लागु औषधलाई सुरक्षाको मुख्य चुनौतिको रुपमा लिएर अभियान थालेको बाँके प्रहरीले ११ महिनामा दुई किलो १११ ग्राम ३५२ मिली ग्राम ब्राउन सुगर बरामद गरेको छ । बाँकेको मुख्य नाका जमुनाह र अन्य सहायक नाका भएर लागु औषधको कारोवार, ओसारपसार तथा प्रयोगकर्ता बढ्दा सुरक्षा चुनौति थपिएपछि बाँके प्रहरीले नियन्त्रणका लागि विशेष निगरानी बढाएको बाँकेका प्रहरी प्रमुख एसपी तुलबहादुर कार्कीले बताए ।
उनका अनुसार, बाँके प्रहरीले ११ महिनामा एक हजार आठ सय ९१ ट्याब्लेट नाइट्रजेपाम, ६ हजार पाँच सय १३ ट्याब्लेट ट्रामाडोल, चार किलो दुई सय ग्राम चरेश, दुई किलो २५० ग्राम गाँजा बरामद गरेको छ । लागु औषध ओसारपसारमा संलग्न दुई सय ३१ जनालाई पक्राउ गरि कानुन दायरामा ल्याइएको एसपी कार्कीले बताए ।
यस अवधिमा पाँच सय ५९ जना फरार अपराधी पक्राउ गरि दुई सय ४८ वर्ष १३ दिन कैद भुक्तान तथा एक करोड ९५ लाख ६० हजार ९६७ रुपैयाँ जरिवाना असुल गरिएको बाँके प्रहरीले जनाएको छ । ‘अदालतबाट सजाय फैसला भएर फरार रहेका अपराधिलाई पक्राउ गरि कानुनी दायरामा ल्याउने सरकारको नीति अनुसार पक्राउ गर्न प्रहरीको विशेष टोली परिचालन गरिएको छ,’ उनले भने ।
बैशाखदेखि फागुनसम्मको अवधिमा बाँके प्रहरीमा एक हजार चार सय ७४ वटा मुद्धा दर्ता भएका छन् । किटानी जाहेरीमा नाम रहेका मध्ये एक हजार दुई सय ८५ जनालाई पक्राउ गरि कानुनी दायरामा ल्याइएको उनले बताए । ‘यस अवधिमा पाँच सय २ वटा पेन्डिङ मुद्धा फच्यौैट भएको एसपी कार्कीले अनलाइन खोजखवरलाई जानकारी दिए ।
उनले ११ महिनामा चार हजार आठ सय ४८ वटा निवेदन परेकोमा चार हजार तीन सय ५३ वटा फच्यौट भएको बताए । सवारी धनीको नाम नखुलेका एक सय २१ वटा मोटरसाइकल र स्कुटर नियन्त्रणमा लिएर लिलाम गरि ६ लाख १२ हजार रुपैयाँ राजस्व संकलन गरिएको बाँके प्रहरीले जनाएको छ ।
यस अवधिमा बाँके प्रहरीले पाँच करोड ७७ लाख ९५ हजार १८१ रुपैयाँ बराबरको अवैध सामान बरामद गरि आवश्यक कारवाहीका लागि नेपालगन्ज भन्सार कार्यालयमा पठाइएको एसपी कार्कीले बताए । अबैध सामानसहित १४ जनालाई पक्राउ गरिएको छ भने ट्रक एक, एक माइक्रो बस, चार वटा जिप, २ वटा कार र २० वटा मोटरसाइकल नियन्त्रणमा लिएर कानुनी कारवाही गरिएको छ,’ उनले भने ।
बाँके प्रहरीले सवैभन्दा धेरै ट्राफिक कारवाहीबाट राजस्व संकलन गरेको छ । ‘गत ११ महिनामा ट्राफिक नियम उलंघन गर्ने ३० हजार १३६ वटा सावरी साधनलाई कारवाही गरी दुई करोड ६३ लाख २४ हजार रुपैयाँ राजस्व संकलन भएको छ,’ एसपी कार्कीले भने ।
भारतबाट ल्याइएका करिव १२ लाख ६४ हजार ८१० रुपैयाँ मुल्य बराबरको ब्रोइलर कुखराको चल्ला, मासु र कुखरा आवश्यक कारवाहीका लागि पशु क्वारेन्टाइन कार्यालय नेपालगन्जमा पठाइएको उनको भनाई छ । उनले अबैध रुपमा नदिजन्य पदार्थ उत्खनन् गर्ने ८ वटा जेसिवी, २२ वटा टिप्पर र १३ वटा ट्याक्टरलाई नियन्त्रणमा लिएर कारवाही गरि एक लाख ७९ हजार रुपैयाँ राजस्व संकलन गरिएको जानकारी दिए ।
हुण्डी कारोवारमा संलग्न २४ लाख ६२ हजार ३१५ रुपैयाँसहित तीन जनालाई पक्राउ गरि कानुनी कारवाही अगाडी बढाएको बाँके प्रहरीले अनलाइन सट्टेबाज (जुवा) खेल्ने, खेलाउने १५ जनालाई पक्राउ गरि कानुनी दायरामा ल्याएको छ । ‘गत १० भदौँमा बाँके प्रहरीले ४०७ ग्राम सुन, १० किलो ६१३ ग्राम चाँदीसहित ४ जनालाई पक्राउ गरेको बताउँदै एसपी कार्कीले ४० लाख १० हजार २५५ नेपाली रुपैयाँ र ५९ हजार ५ सय भारतीय रुपैयाँसहित ७ जना हुण्डि कारोबारी पक्राउ गरि कानुनी दायरमा ल्याउन सफल भएका छौँ,’ उनले भने ।
बाँके प्रहरीले गत असोज २७ र २८ गते नाबालिकालाई सामुहिक करणी गर्ने ५ जनालाई पक्राउ गरि कानुनी दायरामा ल्याउन सफल भएको छ । जमिनमुनीबाट सुन निकाली दिन्छु भनी दुई करोड ठगी गर्ने मानिसलाई पक्राउ गरी कानुनी प्रक्रिया अगाडी बढाएको छ । ‘नक्कली जग्गा धनी श्रेस्ता बनाई बैंकमा धितो राखी रकम ठगी गने कार्यमा संलग्न सात जनालाई पक्राउ गरि कारवाही प्रक्रिया अगाडी बढाइएको छ,’ एसपी कार्कीले भने ।
Discussion about this post