बाँके बैशाख १६ गते ।
गर्मी बढेसँगै बाँकेसहित तराईका जिल्लामा तरबुजाको व्यापार बढेको छ । बाँकेको नेपालगञ्ज, कोहलपुर र खजुरा बजार क्षेत्रमा तरबुजाको ब्यापार बढेको हो । नेपालगञ्जका चोक, चौतारामा तरबुजा राखेर बिक्री गर्नेहरू बढेका छन् । बैशाख लागेदेखि गर्मी बढ्दै गइरहेको तराईका जिल्लामा अब साउन–भदौमा लगातार झरी नपरुन्जेलसम्म तरबुजाको राम्रो व्यापार हुने गरेको छ ।
बैशाखको मध्यदेखिनै गर्मी बढेसँगै डुडुवा गाउँपालिका र भारतका विभिन्न बजारबाट तरबुजा ल्याएर बिक्री गर्न शुरु गरेको ब्यापारी नइम राईले बताए । नेपालगन्जको सडक र गल्लीमा डुलेर ठेलामा ब्यापार गर्दै आएका उनले अब गर्मीयामभर यसैको व्यापार गरेर परिवारको गुजारा चलाउने बताए ।
जाडोयाममा अन्य काम गर्ने र गर्मी लागेपछि तरबुजा बेच्ने गरेको राईको भनाइ छ । नेपालगन्जमा अहिले तरबुजा प्रतिकेजी ५० रुपैयाँमा बिक्री भइरहेको छ । गाउँ गाउँबाट बजार आउने सर्वसाधारणले शीतलताका लागि यो मौसममा तरबुजा किनेर लैजाने गरेका छन् । नेपालगञ्जको विभिन्न ठाउँमा एक दर्जनभन्दा बढी व्यापारीले तरबुजा बिक्री गरिरहेका छन् ।
व्यापारीका अनुसार डुडुवाको वडा नं. ४ कम्दी, सीमावर्ती भारतीय बजार रुपईडिहा र नानपाराबाट तरबुजा यहाँ ल्याएर बिक्री गर्ने गरिन्छ । सडक किनारमा ठेला राखेर तथा फलफूल पसलमा समेत तरबुजा बिक्री गर्ने गरिएको छ ।
Discussion about this post