बाँके बैशाख १७ गते ।
बाँकेको राप्तीसोनारी गाउँपालिकाले महिलालाई हस्तकलाका सामाग्री उत्पादन गर्ने सीप प्रदान गर्न सुरु गरेको छ । थाकलको पात र मकैको खोस्टाबाट हस्तकलाका सामाग्री उत्पादन गर्ने सीप सिकाएर महिलाहरुलाई आयआर्जनमा प्रेरित गर्न तालिम दिन सुरु गरिएको हो ।
गाइभैसीलाई खुवाउन प्रयोग गरिँदै आइएको मकैको खोस्टा र वन जंगलमा पाइने थाकलको पातबाट हस्तकलाका सामाग्री उत्पादन गर्न सिकाइने छ । मंगलवार उक्त तालिमको गाउँपालिकाका उपाध्यक्ष मनिषा सिंह थारुले उद्घाटन गरिन् । ‘स्थानीय स्रोत र साधन, रोजगारी श्रृजनाको प्रमुख आधार’ भन्ने नाराका साथ ३० दिने तालिम सुरु भएको उनले बताइन् ।
प्राकृतिक रेशाजन्य वनस्पती थाकलको पात र मकैको खोस्टाबाट विभिन्न प्रकारका हस्तकलाका सामाग्री उत्पादन गर्ने सीप सिकाएर उनीहरुलाई आयआर्जनतर्फ जोड्न खोजिएको उपाध्यक्ष थारुले बताइन् । स्थानीय महिलाहरुको सीपको आधारमा उत्पादन भएका सामाग्रीहरुको बजारीकरणमा समेत सहजीकरण गरिने उनले बताइन् ।
‘स्थानीय स्रोत र साधनको सदुपयोग गरेर महिला दिदिवहिनीहरुलाई आत्मनिर्भर बनाउने उद्देश्यले तालिम राखिएको हो उनले भनिन्–‘तालिमबाट सिकेका कुराहरुलाई व्यवहारिक जीवनमा लागु गर्नुहुनेछ भन्ने विश्वास लिएकी छु ।’
राप्तीसोनारी गाउँपालिकाको आयोजना तथा ओम राजश्री मल्टी एग्रो प्रालिको प्राविधिक सहयोगमा तालिम सुरु भएको हो । महिलालाई स्वाबलम्वी र उद्यमी बनाउन राप्तीसोनारी गाउँपालिकाले विभिन्न कार्यक्रम गर्दै आएको पनि उनले बताइन् । सहभागि महिलाहरुलाई ओम राजश्री मल्टी एग्रो प्रालिले तालिम दिनेछ ।
स्थानीय स्तरमा पाइने रेशाजन्य वनस्पतीमार्फत हाते झोला, टोपी, फुलदानी, टोकरी लगायतका विभिन्न सामाग्रीहरु उत्पादन गर्ने सीप सिकाइने तथा ओम राजश्री मल्टी एग्रो प्रालिले जानकारी दिएको छ ।
Discussion about this post