बाँके बैशाख २० गते ।
नेकपा (एमाले) का महासचिव शंकर पोखरेलले मरिसकेको राजतन्त्रलाई फर्काउने दुष्प्रयास नगर्न चेतावनी दिएका छन् । नेपाल मुस्लिम इत्तेहाद संगठनको सातौं राष्ट्रिय महाधिवेशनको उद्घाटन शत्रलाई शनिवार नेपालगन्जमा सम्बोधन गर्दै महासचिव पोखरेलले राजतन्त्रमा नभएको विकास लोकतन्त्रले दिएको बताए ।
नेपालमा बलियो राजनीतिक शक्ति निर्माणका लागि जनताले संकल्प गर्नुपर्ने समय आएको उनको भनाई थियो । ‘कुनै दलले बहुमत ल्याउन नसक्दा छिटो–छिटो सत्ता समीकरण बदल्ने अवस्था छ । सत्ता समिकरण छिटो–छिटो बदलिँदा मुलुक निर्माणमा समस्या सिर्जना भएको छ,’ महासचिव पोखरेलले भने ।
उनले अव कुनै एउटा दललाई बहुमत दिए मात्र देश निर्माणमा टेवा पुग्ने धारणा राखे । साना दलका कारण दीर्घकालिन सरकार गठनमा असर परेको बताउँदै उनले जनताले अब साना दललाई भन्दा ठूला दललाई भोट दिएर बलियो सरकार गठनका लागि जनमत दिनुपर्ने बताए । छिमेकी देश भारत र चीनमा बहुमतको सरकार भएकोले देश निर्माणमा टेवा पुगेको छ,’ उनले भने ।
उनले राजनीतिक स्थिरता, सुशासन र विकासका लागि नेपाली कांग्रेस र एमाले मिलेर सरकार गठन गर्न बाध्य भएको बताए । ‘दुई ठूला दल मिलेर सरकार गठन गर्ने रहर होइन, बाध्यता हो । बलियो सरकार भए मात्र देशमा विकास सम्भव भएको हामीले बुझ्यौँ र दुई ठूला दल मिलेर सरकार गठन बर्न बाध्य भयौँ,’ महासचिव पोखरेलले भने ।
महासचिव पोखरेलले लोकतन्त्र आएपछि विकासले फड्को मारेको जिकिर गरे । ‘पञ्चायती ब्यवस्थामा नेपालीको जिडिपी दुई सय डलर थियो, अहिले एक हजार चार सय पुगेको छ,’ उनले भने, ‘दुई सयबाट १४ सय पुग्यो, तर लोकतन्त्रमा केहि भएन भनेर अफबाह फैलाएर लोकतन्त्रलाई कमजोर पार्ने काम गरिदैछ ।’
नेपाल मुस्लिम इत्तेहाद संगठनका केन्द्रीय अध्यक्ष सेराज अहमद फारुकीको अध्यक्षतामा भएको उद्घाटन कार्यक्रममा एमालेका सचिव एवम् लुम्विनी प्रदेश इन्चार्ज पद्मा अर्याल, मोेर्चा विभाग प्रमुख भानुभक्त ढकाल, प्रतिनिधिसभाका सदस्य सूर्य ढकाल, दिपा शर्मा, नेकपा एमालेका केन्द्रिय सदस्य एवम् मुस्लिम विभाग इन्चार्ज मोहम्मद हारुन हलवाई, पशुपति दयाल मिश्र लगायतले शुभकामना दिएका थिए । कार्यक्रम नेपाल इत्तेहाद संगठनका नेता हलिम शाहले गरेका थिए ।
Discussion about this post