बाँके बैशाख २० गते ।
सशस्त्र प्रहरी बल नेपाल प्रस्तावित सीमा सुरक्षा गुल्म (विओपी) जमुनाहले सरोकारवाला निकायसँग शनिवार छलफल गरेको छ ।
सीमामा हुने अपराध, अवैध चोरी पैठारी, मानव बेचविखन र लागु औषध नियन्त्रणका विषयमा जनप्रतिनिधि, सुरक्षा निकाय, नागरिक समाज र मानव बेचविखन विरुद्धको क्षेत्रमा काम गर्ने संघसंस्थाका प्रतिनिधिसँग छलफल गरिएको गुल्मपति सशस्त्र प्रहरी नायव उपरीक्षक (डिएसपी) महेश विक्रम केसीले बताए ।
नेपालगन्ज उपमहानगरपालिका १६ का वडा अध्यक्ष कलिम अहमद अन्सारीको अध्यक्षतामा भएको बैठकमा नाकामा हुने अपराधका घटना न्यूनिकरण गर्न सरोकारवाला निकायसँग छलफल गरिएको बताए । ‘नाकामा हुने विभिन्न खालका अपराधिक घटना घट्न नदिन जनप्रतिनिधि, विभिन्न संघसंस्था, स्थानीयबासी र नागरिक समाजका अगुवाको सहयोग अपरिहार्य छ,’ उनले भने, ‘नाकामा हुने अवैध चोरी पैठारी, मानव बेचविखन र लागु औषध नियन्त्रण गर्न स्थानीयसँग सहकार्य आवश्यक रहेको सशस्त्र प्रहरीको ठम्याई छ ।’
सशस्त्र प्रहरी बल नेपाल प्रस्तावित सीमा सुरक्षा गुल्म (विओपी) जमुनाहले सरोकारवाला निकायसँग हरेक महिना छलफल गर्दै आएको छ । छलफलमा गत महिनाको समिक्षा र आगामी महिनाका लागि योजना बनाउने गरेको डिएसपी केसीले बताए । ‘सरोकारवाला निकायसँग नियमित छलफल र परामर्शमा छौँ,’ उनले भने ।
वडा अध्यक्ष अन्सारीले नाकामा हुने विभिन्न खाले अपराध नियन्त्रणमा सुरक्षा निकायलाई सहयोग गर्दै आएको बताउँदै आगामी दिनमा पनि सहयोग गर्ने बताए । उनले सुरक्षा निकायलाई परेको समस्या समाधानका लागि दिनरात नभनी सहयोग गर्ने प्रतिवद्धता जनाए ।
छलफलमा इलाका प्रहरी कार्यालय जमुनाहका सहायक प्रहरी निरीक्षक खगेन्द्र केसी, नागरिक समाजका बरकत अलि, आफन्त नेपालका सुनिता सारु, नेपालगन्ज उद्योग बाणिज्य संघका सदस्य डम्बरबहादुर चन्द लगायतले मानव बेचविखन, लागु औषध र अवैध चोरी पैठारीको बारेमा विचार राखेका थिए ।
Discussion about this post