बाँके बैशाख २७ गते ।
नेपाल–भारत सीमा अन्तरगत जमुनाह नाकाको मुल गेटमा राखिएको झण्डाले नेपाल र नेपालीलाई गिज्याइरहेको छ । राष्ट्र र राष्ट्रियताको प्रतिकको रुपमा रहेको उक्त झण्डाको रङ् उडेकोमात्र छैन, च्यातिएको समेत छ ।
सिंगो देशको प्रतिनिधित्व गर्ने मुल गेट र त्यसमा राखिएको झण्डाले नेपाल र नेपालीलाई गिज्याइरहेको सर्वसाधारण बताउँछन् । नेपाललाई चिनाउने राष्ट्रिय झण्डाको समेत ख्याल नगर्नु सिंगो नेपाल र नेपालीको दुर्भाग्य भएको भारतबाट फर्किदै गरेका एक नेपालीले अनलाइन खोजखवरलाई बताए ।
‘यो एउटा जिल्ला वा प्रदेशलाई जोड्ने गेट होइन । यो त सिंगो नेपाल र नेपालीको पहिचान झल्काउने र अस्तित्व जोडिएको छ । उपमहानगर र स्थानीय प्रशासनलाई सानो लाग्न सक्छ, तर राष्ट्रिय झण्डाको समेत ख्याल गर्न नसक्नु यहाँका प्रशासकको कमजोरी मान्नु पर्छ,’ उनले भने ।
खुइलिएको राष्ट्रिय झण्डाको विभिन्न भाग च्यातिएको छ । हावा चलेपछि फहराउने उक्त झण्डालाई नफर्ने हो भने अझ धेरै च्यातिने निश्चित छ । यसअघि सशस्त्र प्रहरीले मुल गेटमा रंगरोगन गर्दा ठूलै हल्लिखल्ली गरिएको थियो । रंगरोगन भएपछि प्रचारबाजी गरिए पनि खुइलिएको झण्डामा कसैको ध्यान पुग्न नसकेको सर्वसाधारण बताउँछन् ।
‘जमुनाह नाका भएर विभिन्न देशका नागरिक नेपाल आउँछन् । कुन देशको अवस्था कस्तो छ भन्ने मुल गेटमा भएका बस्तुले झल्काउँछ । देशको मुल गेटमा रहेको झण्डाले नेपालको पहिचान झल्काउँछ । फाटेको र रंग खुइलिएको झण्डा तत्काल फेरेर नयाँ राख्नु पर्छ,’ जमुनाह नाकामा भेटिएको एक नेपालीले भने ।
Discussion about this post