सुर्खेत जेठ १९ गते ।
जंगलमा फिरन्ते जीवन बिताउने राउटे समुदायको आफ्नै नियम छ । उनीहरु बाहिरको मान्छेसँग हत्तपत्त नजिक हुँदैनन् । उनीहरुको बस्तीभित्र प्रवेश गर्नका लागि पनि राउटे मुखियाको अनुमतिबिना पाइँदैन । उनीहरुको बस्तीबाहिरै लेखिएको हुन्छ– मुखियाको अनुमतिबिना प्रवेश निषेध । राउटे समुदाय बाहिरका मानिससँग खुल्दैन ।
अझ महिलाहरु त बोल्न धक मान्छन् । तर, अनेक प्रलोभनमा पर्दा पछिल्लो समय राउटे समुदायका युवती दुव्र्यवहारमा पर्न थालेका छन् । राउटे युवतीहरु दुव्र्यवहारमा परेको भिडियो केही दिनयता मात्र सामाजिक सञ्जालमा छाइरहेको छ । युट्युबर, टिकटकर र फेसबुक प्रयोगकर्ताले समुदायका युवती तथा अन्य व्यक्तिसँग फोटो खिच्ने र भिडियो बनाउने क्रम बढ्दै गएको छ । सो क्रममा राउटे युवती दुव्र्यवहारको सिकार बनिरहेका छन् ।
पछिल्लोपटक एउटा ट्रकमा चार युवतीलाई राखेर दुव्र्यवहार गरेको भिडियो फेसबुकमा सार्वजनिक भएको हो । घर्ती जगत नाम भएका फेसबुक प्रयोगकर्ताले १५ सेकेन्डको भिडियो केही दिनअघि सार्वजनिक गरेका हुन् । भिडियो सार्वजनिक गर्दै उनले प्रश्न गरेका छन्, ‘समाजमा के सन्देश जान्छ ? पक्कै राम्रो होइन ।’ भिडियो कुन ठाउँ र कहिलेको हो भन्ने स्पष्ट छैन । चारजना राउटे युवतीका बीचमा बसेका एक युवाले गलत हर्कत गरिरहेको भिडियो क्लिपमा देख्न सकिन्छ ।
अँगालो हालेर बोलिरहेका युवाको व्यवहारले राउटे युवती असहज मानिरहेका देखिन्छन् । भिडियो भाइरल गराउने बहानामा यसरी अनावश्यक दुःख दिने र अश्लील हर्कतले राउटे युवतीहरु असुरक्षित बनेका छन् ।
Discussion about this post