रुकुम जेठ १९ गते ।
बत्वा खोलामा पुल नहुँदा रुकुम पूर्वको पर्यटकीय गाउँ मैकोट पुग्न मुस्किल भइरहेको छ । सहिद मार्गको अन्तिम बिन्दु अर्थात् जिरो प्वाइन्ट मानिएको मैकोटसम्म सडकको ट्र्याक खुलेको भए पनि ठूलो पानी पर्दा सवारीसाधन खोलाबाटै वारपार हुने गरेका छन् । मध्य पहाडी लोकमार्गलाई भूमेको काक्रीमा छोडेर पुथाउत्तरगंगा गाउँपालिका–१ मैकोट गाउँसम्म पुग्न करिब ५५ किलोमिटर कच्ची बाटोमा यात्रा गर्नुपर्छ ।
हुकामपछि भेटिने मैकोट गाउँ पछिल्लो समय चर्चित भएको गाउँ हो । त्यस कारण यहाँ घुम्न आउनेहरूको सङ्ख्या बढेको छ । तर खोलामा पुल नहुँदा समस्या भइरहेको स्थानीय वीरेन्द्र बुढाले बताए । सहिद मार्ग योजना कार्यालय रोल्पा लिवाङमार्फत पुथाउत्तरगंगा–५ हुकामसम्म काम भइरहेको भए पनि त्यसअघि मैकोटसम्म भने गाउँपालिकाले नै ट्र्याक खोलेको र अहिले स्थानीय पूर्वाधार विकास कार्यालय बुटवलमार्फत बाटोको स्तरोन्नतिको काम भइरहेको पुथाउत्तरगंगा–१ का वडाध्यक्ष वीरमान विकले बताए । ‘अगामी वर्षका लागि बेलीब्रिज परेको छ भन्ने सुनेका छौँ, तर पक्का थाहा छैन ।
यहाँ पुल नबनेसम्म आवतजावत गर्न मुस्किल छ,’ वडाध्यक्ष विकले भने, ‘अलिकति ठूलो पानी पर्दा खोला ह्वात्तै बढ्छ । अनि सवारी तार्न गाह्रो हुन्छ ।’ हाल सवारीसाधनहरू जसोतसो मैकोटसम्म पुगिरहेका भए पनि पानी पर्न सुरु भइसकेकाले अब सम्भव नहुने स्थानीयहरूले बताएका छन् ।
सवारीसाधन मैकोटसम्म नपुग्दा दैनिक उपभोग्य र अत्यावश्यक सामग्रीको आपूर्तिमा मुस्किल हुने उनीहरूको भनाइ छ । कुल २ सय २० किलोमिटर लामो सहिद मार्ग हाल घोराहीबाट सुरु भएर रोल्पा हुँदै रुकुम पूर्वको मैकोटसम्म पुग्छ । रुकुम पूर्वमा जम्मा ७५ किलोमिटर लामो यो मार्गअन्तर्गत रोल्पाको केही क्षेत्रमा ग्राभेल र कालोपत्रे गरिए पनि धेरैजसो स्थानमा ट्र्याक मात्रै खोलिएको छ ।
Discussion about this post