कैलाली असार ८ गते ।
कैलालीको धनगढी उपमहानगरपालिकाले आगामी आर्थिक वर्ष २०८२र०८३ को लागि २ अर्ब ५६ करोडभन्दा बढीको बजेट ल्याएको छ। सुदूरपश्चिम प्रदेशको एउटा मात्र उपमहानगरपालिका रहेको धनगढी उपमहानगरपालिकाको शनिवार सम्पन्न नगर सभाबाट २ अर्ब ५६ करोड चार लाख ६६ हजारको बजेट पारित भएको हो।
नगरसभामा उपप्रमुख कन्दकला रानाले बजेट प्रस्तुत गरेकी थिइन्। उपमहानगरले चालु आर्थिक वर्षको बजेटभन्दा ३७ करोड ६२ लाख ३३ हजार सात सय ८० रुपैयाँ अर्थात् १७ दशमलव २२ प्रतिशतले बजेट वृद्धि गरेको छ। धनगढी उपमहानगरपालिकाले एक अर्ब ३८ करोड २६ लाख ५१ हजार ६ सय ४० रुपैयाँ चालुतर्फ र एक अर्ब १८ करोड २९ लाख ३५ हजार २ सय ९२ रुपैयाँ पुँजीगत तर्फको बजेट पारित गरेको छ। उपमहानगरपालिकाको कुल बजेटको ५३ दशमलव ८ प्रतिशत चालु तर्फ र ४६ दशमलव २ प्रतिशत पुँजीगत बजेट रहेको छ।
उपमहानगरपालिकाको आन्तरिक आय ५४ करोड ७९ लाख ६७ हजार एक सय ११ रुपैयाँ रहेको छ। राज्यश्व बाँडफाँडबाट ५७ करोड ६० लाख ६२ हजार एक सय ४३, नेपाल सरकारबाट वित्तीय हस्तान्तरण ९९ करोड नौ लाख, प्रदेश सरकारबाट वित्तीय हस्तान्तरण ११ करोड २२लाख ४१ हजार र मौज्दात ३३ करोड ३२ लाख ९५ हजार सात सय ४६ रुपैयाँ रहेको छ। उपमहानगरपालिकाले चालु आर्थिक वर्षमा २ अर्ब १८ करोड ४२ लाख ३२ हजार २ सय २० रुपैयाँ बजेट कार्यान्वयन गर्दै छ।
उपमहानगरको चालु आर्थिक वर्षमा जेठ मसान्तसम्म एक अर्ब ८१ करोड पाँच लाख ८४ हजार सात सय २२ रुपैयाँ खर्च गरेको छ।
शनिबार नै बजेटअघि धनगढी उपमहानगरका नगर प्रमुख गोपाल हमालले उपमहानगरको नीति तथा कार्यक्रम नगरसभाको १३ औँ अधिवेशनमा प्रस्तुत गरेका थिए।
Discussion about this post