बाँके असार १२ गते ।
बाँकेको राप्तिसोनारी गाउँपालिका –७, प्रिपहवाकी फूलमती आर्या वर्षा सुरु भएपछि रातभरि असजिलो महसुस गर्थिन् । बाढीले घर बगाउने डरले उनको निन्द्रा हराउँथ्यो । दुई वर्षअघि गाउँपालिकाले स्थापना गरेको साइरन प्रणालीले अब उनी ढुक्कसाथ सुत्न पाएको बताउँछिन् । साइरन बजेपछि तत्काल सुरक्षित स्थानमा जाने गरेको उनले बताइन् ।
प्रिपहवाकै अनारकला धोबीले पनि सम्भावित बाढीको चेतावनीका लागि तयारी अवस्थामा एउटा झोला राखेकी छिन्, जसमा नागरिकता, शैक्षिक प्रमाणपत्र, र लालपूर्जाजस्ता महत्वपूर्ण कागजात छन् । साइरनको सूचना पाएपछि उनी त्यो झोला बोकेर अग्लो स्थानमा दौडिहाल्छिन् ।
स्थानीय अगुवा फारुक अलीका अनुसार साइरन प्रणालीले समयमै सूचना दिँदा जोखिम न्यून गर्न सजिलो भएको छ । ‘हामीले चेतावनी पाएपछि अग्लो ठाउँमा जान पाउँछौं, यसले राहत मिलेको छ’ उनले भने । वडा अध्यक्ष रामलखन चौधरीले साइरन प्रणाली जडान भएपछि डुवानको असर कम हुँदै गएको बताए । उनका अनुसार पूर्वसूचना प्रणालीले वडाबासीलाई सम्भावित क्षतिबाट जोगिन प्रभावकारी भूमिका खेलेको छ ।
Discussion about this post