बाँके भदौ १४ गते ।
नेपाल–भारत सीमा नाका अन्तर्गत हरेक ५ सय मिटर दुरीमा सशस्त्र प्रहरीको टोलीले ड्युटी दिन्छन् । ड्युटीमा खटिएका सशस्त्र प्रहरीको काम अबैध सामान नियन्त्रण गरि राजस्व बढाउनु हो । तर पछिल्लो समय नेपालगन्ज बजारबाट धमाधम अबैध सामान बरामद भइरहेको छ ।
सशस्त्र प्रहरीले चाहने हो भने सियो समेत ल्याउन मुस्किल पर्ने गरि नाकामा सशस्त्र प्रहरी परिचालन भए पनि सशस्त्र प्रहरीको टोलीले नेपालगन्जबाट बाहिरिन लागेको एक लाख ८० हजार भारतिय रुपैयाँ मूल्य बराबरको अवैध औषधि बरामद गरेको छ । नेपालगन्ज उपमहानगरपालिका–१८ लग्धवाबाट बरामद भएको उक्त औषधि २३ लाख रुपैयाँभन्दा बढिको भएको दावी सशस्त्र प्रहरीले गरे पनि तस्करका अनुसार उक्त औषधि भारतिय रुपैयाँ एक लाख ८० हजार बराबरको भएको जिकिर गरेका छन् ।
सशस्त्र प्रहरीले औषधिमा उल्लेख भएको मुल्यलाई आधार मानेर बरामद भएको औषधिको मूल्यांकन गरे पनि उक्त औषधि एक लाख ८० हजार भारतिय रुपैयाँ बराबरको भएको तस्करको दावी छ । बरामद औषधिको भारतिय मूल्य प्रति सिसि १४ सय ९८ रुपैयाँ रहेको छ ।
सशस्त्र प्रहरीको दावीलाई मान्ने हो भने उक्त औषधिको मूल्य अझ बढ्नु पर्ने देखिन्छ । सशस्त्र प्रहरीले भारी परिमाणको अवैध औषधि बरामद गर्नु राम्रो हो, तर यति ठूलो परिमाणको औषधि नाकाबाट नेपालगन्जसम्म कसरी आइपुग्यो ? यो सर्वत्र चासोको विषय बनेको छ । ‘तस्करसँग कुरा नमिलेपछि सशस्त्र प्रहरीले औषधि बरामद गरेको हो,’ एक तस्करले अनलाइन खोजखवरसँग भने, ‘नत्र यति ठूलो परिमाणको औषधि नेपालगन्जसम्म ल्याउन कुनै सम्भव छैन ।’
नेपालगन्जको मुख्य नाकामा सशस्त्र प्रहरीले कडाई गरेपछि तस्करले सहायक नाका प्रयोग गर्न थालेका छन् । विहीवार बरामद भएको औषधि पनि भज्जुपुर्वा नाका हुँदै लाइएको श्रोतले जनाएको छ । भज्जुपुर्वामा पनि सशस्त्र प्रहरीको विओपी छ । सशस्त्र प्रहरीले पहिले भज्जुपुर्वाबाट बरामद गरेको जनाए पनि पछि गएर बरामद भएको स्थान परिवर्तन गरेको थियो । यसले पनि सशस्त्र प्रहरीको नियतमाथि शंका उब्जाएको छ ।
नाकामा कडाई गरि अवैध सामान नियन्त्रण गरि राजस्व बढाउने सकारात्मक कार्य हो । यसमा सवैले साथ र सहयोग गर्नुपर्ने हुन्छ, तर सशस्त्र प्रहरीले मुख्य नाकामा कडाई गरेर तस्करलाई सहायक नाकाबाट सामान ल्याउन लाइन दिएको जानकार बताउँछन् । ‘मुख्य नाकाबाट ल्याउन सम्भव छैन, तर सहायक नाकाबाट सशस्त्र प्रहरीले लाइन दिएको छ,’ एक तस्करले भने ।
यो समाचार पनि पढ्नुहोस्
सशस्त्रका घुमुवाले गर्दै छन् डिआइजी र एसपीको बदनाम : तस्करलाई मस्ती, सर्वसाधारणलाई सास्ती
Discussion about this post