बाँके भदौ २४ गते ।
नेपालगन्ज उपमहानगरपालिका २१ विर्ताका सलाउद्दिन शेष रातभर जाग्राम बस्छन् । उनी चोरलाई गाउँ छिर्न नदिन गाउँलेसँगै आफ्नो टोलमा रातभर गस्ती गर्छन् । चोरको विगविगी भएको खवर सुनेका उनी विहान ५ वजेमात्र सुत्न पाउँछन् । ‘रातभर गाउँलेसँगै टोलमा गस्ती गर्छु । चोरहरु खेतमा भाग्छन् । हामी लखेट्दै जान्छौँ । धानमा कहाँ लुक्छन् पत्तै हुँदैन,’ उनले भने ।
नेपालगन्ज उपमहानगरपालिका २१ का ६ घरमा चोरी भइसकेको उनले बताए । ‘घरमा चोरी हुने डरले घरमा दुई जना छौँ भने एक जना सुत्छौँ, एक जना रातभर गस्ती गर्छौँ,’ उनले भने ।
नेपालगन्ज उपमहानगरपालिका ६ का वडा अध्यक्ष शमिरप्रताप सिंहले पनि वडाका विभिन्न टोलबासी रातभर जाग्राम बस्ने गरेको बताए । उनले फुल्टेक्रा चोक, रामनगर, नयाँ बस्ती लगायत टोलका बासिन्दा रातभर नसुतेर गस्ती गर्दै आएको बताए । उनले छिमेकीको घरमा चोर पसेको बताउँदै लखेट्दै जाँदा एक जनालाई फेला पारी प्रहरीको जिम्मा लगाएको बताए । ‘टोलबासी एकजुट भएर रातभर गस्ती गर्छन् । एक दिन मास्क लगाएर मोटरसाइकलमा भाग्दै गरेका एक जनालाई फेला पारेर प्रहरीको जिम्मा लगायौँ । प्रहरीले उनको साथबाट ब्राउनसुगर समेत फेला पारेको खवर आएको छ,’ उनले भने, ‘चोरको डरले वडाबासी रातभर सुत्न सक्दैनन् ।’
नेपालगन्ज उपमहानगरपालिका २१ विर्ताका फारुक खानले पनि चोरको डरले रातभर सुत्न नसकेको गुनासो गरे । उनले वडाका ६ घरमा चोरी भएको बताउँदै थप चोरी हुन नदिन स्थानीयबासी सजग भएको बताए । उनले आलोपालो गरि सुत्ने र जाग्राम बस्ने गरेको सुनाए । ‘वडाबासीमा चोरको भयङ्कर त्रास छ । रातको समयमा न प्रहरी आउँछ, न त वडाका जनप्रतिनिधिले चासो दिन्छन् । हामीलाई रात किन पर्छ जस्तो लाग्छ,’ उनले भने ।
तर, बाँकेका प्रहरी प्रमुख एसपी रामप्रसाद घर्तीमगरले नगरमा चोरीको छिटपुट घटनामात्र भएको दावी गर्छन् । उनले चोरीको अफवाह फैलिएको बताउँदै हल्लाको पछि नलाग्न आग्रह गरेका छन् । ‘नेपालगन्जमा चोरीका छिट्पुट घटना बाहेक अरु भएको छैन । चोरीको अफवाह फैलिएको मात्र हो । हल्लाको पछि नलाग्न म अनुरोध गर्दछु,’ उनले भने, ‘चोरी नियन्त्रण गर्न बाँके प्रहरी तदारुकताका साथ लागेको छ । चोरी हुने सम्भावित क्षेत्रको पहिचान गरि प्रहरी परिचालन गरिएको छ । रातको समयमा थप सुरक्षाकर्मी परिचालन गरिएको छ । ढुक्क भएर सुत्न म अनुरोध गर्दछु ।’
Discussion about this post