बाँके पुस १४ गते ।
पुष महिनाको पहिलो सातादेखिनै शुरु भएको बाक्लो हुस्सु र शीतलहरका कारण बाँकेसहित तराईको जनजीवन प्रभावित भएको छ ।
अत्याधिक चिसो, कुहिरो र शीतलहरका कारण सर्वसाधारणको दैनिकी कष्टकर बनेको छ भने यातायात र दैनिक गतिविधिमा समेत असर परेको छ ।
बिहानैबाट आकाश ढाकिने गरी लागेको बाक्लो हुस्सुका कारण दृश्यता अत्यन्तै कम हुँदा मानिसहरू घरबाट बाहिर निस्कन सकेका छैनन् । चिसो बढेसँगै वृद्ध वृद्धा, बालबालिका तथा बिरामीहरू बढी प्रभावित भएका छन् ।
पूर्व–पश्चिम राजमार्गअन्तर्गत बाँकेको विभिन्न खण्डमा बाक्लो कुहिरोका कारण सवारी आवागमन समेत प्रभावित बनेको छ ।
शीतलहर र बाक्लो हुस्सुले विशेष गरी दैनिक ज्यालादारी गरेर गुजारा चलाउँदै आएका निम्न आय वर्गका नागरिकको जीवन थप कठिन बनेको छ । चिसोका कारण काममा निस्कन नसक्दा उनीहरूको आम्दानी प्रत्यक्षरूपमा प्रभावित भएको छ ।
डुडुवा गाउँपालिका वडा नं. ६ का स्थानीय बासिन्दा घिर्रे कोरीले भने “चिसोका कारण मजदुरी गर्न जान निकै समस्या भएको छ, बिहानैबाट यति धेरै चिसो भयो काममा जान सकिँदैन, काम नगर्दा घर खर्च चलाउनै गाह्रो हुने भयो ।”
यता चिसोबाट जोगिन सर्वसाधारणलाई न्यानो लुगा लगाउन, आगो तथा ताप साधन सुरक्षितरूपमा प्रयोग गर्न र अनावश्यकरुपमा घरबाहिर ननिस्कन सरोकारवाला निकायहरूले आग्रह गरेका छन् ।
बाँकेमा गत बिहीबार घाम लागे पनि शनिबारदेखि निरन्तर बढेको जाडो र दिनभर परिरहेको शीतका कारण सर्वसाधारण अति आवश्यक कामबाहेक घरबाट बाहिर निस्किन पाएका छैनन् ।
यता अत्याधिकरुपमा बढेको चिसोको प्रत्यक्ष असर सर्वसाधारणको स्वास्थ्यमा देखिन थालेपछि स्वास्थ्यकर्मीहरूले चिन्ता व्यक्त गरेका छन् । जाडोका कारण उत्पन्न हुने विभिन्न मौसमी रोगका बिरामीको सङ्ख्या अहिले सरकारी तथा निजी स्वास्थ्य संस्थामा दिनदिनै बढ्दै गएको स्वास्थ्यकर्मीहरूले जनाएका छन् ।
स्वास्थ्य संस्थाहरूका अनुसार पछिल्ला दिनमा रुघाखोकी, ज्वरो, फ्लु, दम, निमोनिया, नाक–कान–घाँटीसम्बन्धी समस्या, श्वासप्रश्वास सम्बन्धी रोग तथा उच्च रक्तचापका बिरामीहरू उल्लेख्यरुपमा बढेका छन् ।
विशेष गरी बालबालिका, वृद्धवृद्धा र दीर्घरोगीहरु जाडोका कारण बढी प्रभावित भएको देखिएको भेरी अस्पतालका वरिष्ठ फिजिशियन डा. राजन पाण्डेले जानकारी दिए ।
Discussion about this post