बाँके पुस २३ गते ।
बाँकेको जानकी गाउँपालिकाले विद्यार्थीहरूलाई लक्षित गरी साइबर अपराध र साइबर सुरक्षासम्बन्धी सचेतनामूलक कार्यक्रम सञ्चालन गरेको छ। गाउँपालिकाको आयोजनामा सुरु भएको उक्त कार्यक्रममा जानकी गाउँपालिका भित्रका ८ वटा माध्यमिक विद्यालयमा अध्ययनरत करिब ४० जना विद्यार्थी तथा शिक्षकहरूको सहभागिता रहेको छ।
दुई दिनसम्म सञ्चालन हुने तालिममा अनलाइनमार्फत हुने ठगीका विभिन्न स्वरूप, सामाजिक सञ्जालको दुरुपयोग, साइबर अपराधका कारण तथा त्यसबाट जोगिने व्यवहारिक उपायबारे विस्तृत जानकारी प्रदान गरिने गाउँपालिका अध्यक्ष छब्बन खाँले जानकारी दिनुभयो। उहाँले प्रविधिको सही प्रयोग आजको आवश्यकता भएको उल्लेख गर्दै विद्यार्थीहरू डिजिटल संसारका सक्रिय प्रयोगकर्ता भएकाले उनीहरू सचेत बने समाज पनि सुरक्षित बन्न सक्ने धारणा व्यक्त गर्नुभयो।
कार्यक्रममा गाउँपालिकाकी उपाध्यक्ष रामप्यारी यादवले जानकी गाउँपालिकाको समृद्धि र सुशासनमा विद्यार्थीहरूको भूमिका महत्वपूर्ण रहेको बताउँदै प्रविधिको सही र जिम्मेवार प्रयोगले समाजलाई सकारात्मक दिशामा अघि बढाउन सकिने उल्लेख गर्नुभयो।
जिल्ला प्रहरी कार्यालय बाँकेका प्रहरी प्रवक्ता प्रहरी नायब उपरीक्षक दिपक पातलीले जिल्लामा बढ्दो साइबर अपराधको अवस्थाबारे तथ्याङ्कसहित जानकारी गराउनुभयो। उहाँका अनुसार चालु आर्थिक वर्षको पुस मसान्तसम्म सामाजिक सञ्जालमार्फत चरित्र हत्या गरेको आरोपमा एक जनाविरुद्ध मुद्दा दर्ता भएको छ। करिब ५०० उजुरी परे पनि धेरैजसो मुद्दा छलफल र समझदारीमार्फत समाधान गरिएको उहाँले बताउनुभयो।
गाउँपालिकाका प्रमुख प्रशासकीय अधिकृत परशुराम उपाध्यायले साइबर प्रविधिलाई नकारात्मक रूपमा मात्र नहेर्न आग्रह गर्दै यसको सकारात्मक प्रयोगमा जोड दिनुभयो। उहाँले प्रविधि ज्ञानसँगै कानुनी सचेतना पनि अपरिहार्य रहेको उल्लेख गर्नुभयो।
त्यसैगरी गाउँपालिकाका सामाजिक विकास संयोजक रामअचल धोबीले सामाजिक सञ्जाल प्रयोग गर्दा अपनाउनुपर्ने सावधानीबारे विद्यार्थीहरूलाई सचेत गराउनुभयो। उहाँले अपरिचित व्यक्तिसँग अनलाइन संवाद नगर्न, व्यक्तिगत विवरण सुरक्षित राख्न र आर्थिक प्रलोभनमा नपर्न विशेष आग्रह गर्नुभयो।
तालिममा प्रहरी निरीक्षक रमेश बिष्टले सहजीकरण तथा प्रशिक्षण प्रदान गरिरहनुभएको छ। उहाँले साइबर अपराध र बालविवाहबीचको सम्बन्ध, त्यसले पार्ने सामाजिक तथा मानसिक नकारात्मक प्रभाव, न्यूनीकरणका उपाय र विद्यमान कानुनी व्यवस्थाबारे जानकारी दिनुभयो।
कार्यक्रममा सहभागी विद्यार्थी कल्पना बर्माले तालिमबाट सामाजिक सञ्जाल सुरक्षित रूपमा प्रयोग गर्ने तरिका सिक्न पाएको बताउनुभयो। अर्की विद्यार्थी शिवानी जैसवालले अनलाइन ठगीका विभिन्न तरिका र त्यसबाट जोगिने उपायबारे जानकारी पाएपछि आफू अझ सतर्क भएको प्रतिक्रिया दिनुभयो।
दुई दिनसम्म सञ्चालन हुने उक्त तालिममा गाउँपालिकाका सूचना प्रविधि अधिकृत विकास जिसी, प्रमुख प्रशासकीय अधिकृत परशुराम उपाध्याय, आईटी विज्ञ अंकित श्रीवास्तवलगायतले सहजीकरण गर्ने गाउँपालिकाले जनाएको छ।
Discussion about this post