पाँच वर्षको संघर्षपछि मोहन गोडियाले पाए नागरिकता

बाँके पुस २३ गते ।
नेपालगन्ज उपमहानगरपालिका–८ का मोहन गोडिया नागरिकता प्राप्तिका लागि करिब पाँच वर्षसम्म भौतारिए। उनले अड्डा–अदालत मात्र होइन, गृहमन्त्रालयदेखि प्रधानमन्त्री कार्यालयसम्म धाए। सबै ठाउँबाट आश्वासन पाए पनि नागरिकता भने पाउन सकेनन्।

तर उनले हिम्मत हारेनन्। करिब पाँच वर्षको अथक प्रयासपछि उनले बुधबार बाँकेका प्रमुख जिल्ला अधिकारी दिलकुमार तामाङको हातबाट नागरिकता प्राप्त गरे। ‘आज मेरो खुसीको कुनै सीमा छैन,’ उनले भने, ‘पाँच वर्षदेखि जारी नागरिकता प्राप्तिको लडाइँ आज पूरा भएको छ।’ गोडिया राष्ट्रिय खेलाडी हुन्। नागरिकता नहुँदा उनले खेलकुद करिअरलाई अगाडि बढाउन सकिरहेका थिएनन् भने पढाइसमेत प्रभावित भएको थियो।

नेपाल नागरिकता ऐन, २०६३ को दोस्रो संशोधन नियमावली चौथोपटक संशोधन भई राजपत्रमा प्रकाशित भएसँगै गोडियालाई नागरिकता प्राप्तिको बाटो खुलेको बाँकेका प्रमुख जिल्ला अधिकारी तामाङले जानकारी दिए। यसअघि जन्मसिद्ध नागरिकता पाएका नागरिकका सन्तानले बाबु र आमा दुवैको नागरिकता भएमा मात्र नागरिकता पाउने कानुनी व्यवस्था थियो। आमा वा बाबुको मृत्यु भएको, वा बाबु वेपत्ता भएको अवस्थामा त्यस्ता सन्तानले नागरिकता पाउन सकिरहेका थिएनन्। तर पछिल्लो संशोधनले जन्मसिद्ध नागरिकता भएका व्यक्तिका सन्तानलाई अंगीकृत नागरिकता दिने व्यवस्था गरेको छ।

नेपाली वंशकी महिलाबाट जन्मिएका सन्तान तथा बाबुको पहिचान खुल्न नसकेका कारण नागरिकता नपाएका नागरिकको समस्या नयाँ संशोधनले सम्बोधन गरेको छ। संशोधनअनुसार आमा जीवित भएको अवस्थामा आमाको स्वघोषणाका आधारमा र आमा निधन भएको अवस्थामा मृत्यु दर्ता प्रमाणपत्र पेश गरेर नागरिकता प्राप्त गर्न सकिने व्यवस्था गरिएको छ।