बाँके पुस २४ गते ।
बर्दियामा प्रहरीले गोली चलाएर लागुऔषध कारोबारीलाई पक्राउ गरेको छ । गुलरिया नगरपालिका वडा नं ११ लालपुरमा लागुऔषध कारोबारीलाई पक्राउ गर्न प्रहरीले दुई राउण्ड गोली चलाएको छ ।
प्रहरीको गोली लागि बहराइच जिल्ला मोतिपुर थाना लौकाही बजारका ३१ वर्षीय फिरोज खान घाइते भएका छन् । लागुऔषध चेकजाँच गर्न खोज्दा प्रहरी माथि आक्रमण गर्दै भाग्न खोजेपछि प्रहरीले गोली चलाएको जिल्ला प्रहरी कर्यालय बर्दियाका प्रहरी नायब उपरीक्षक देवेन्द्रकुमार मल्लले बताए ।
प्रहरीले चलाएको दुई राउण्ड गोलीमध्ये फिरोजको दायाँ खुट्टामा एक राउण्ड गोली लागेको उनले बताए । घाइतेको बर्दिया अस्पतालमा उपचार भइरहेको छ । फिरोजको साथबाट दुई सय ८३ ग्राम लागुऔषध ब्राउनसुगर फेला परेको प्रहरीले जनाएको छ । फिरोजसँगै रहेका अर्का लागुऔषध कारोबारी भागेको प्रहरीले जनाएको छ ।
लौकाही बजार नेपालको सिमावर्ती क्षेत्र हो । बर्दियामा कारोबार हुने लागुऔषधको अधिकांश भाग भारतको लौकाही र बलैगाउँ बजारबाट आउने गरेको स्थानीयहरू बताउँछन् । भारतीय सिमावर्ती बजारमा खुलेआम लागुऔषध बिक्री हुँदा बर्दियाका बालबालिका तथा युवाहरू कुलतमा फस्ने गरेका छन् ।
Discussion about this post