बाँके माघ २९ गते ।
पश्चिम नेपालको केन्द्रविन्दु मानिने बाँके जिल्लामा पछिल्लो समय सडक दुर्घटनाको सङ्ख्या बढ्दो क्रममा देखिएको छ। जिल्ला ट्राफिक प्रहरी कार्यालय बाँकेका अनुसार चालु आर्थिक वर्ष २०८२/८३ को गत सात महिनामा जिल्लाभर ६५३ वटा सवारी दुर्घटना भएका छन्।
ती दुर्घटनामा ३१ जनाको मृत्यु भएको छ भने ६६ जना गम्भीर र एक हजार ३० जना सामान्य घाइते भएका छन्। जिल्ला ट्राफिक प्रहरी कार्यालय बाँकेका प्रमुख प्रहरी निरीक्षक कनकबहादुर शाहीका अनुसार साउनदेखि माघ २५ गतेसम्म भएका दुर्घटनामा २१ पुरुष, ७ महिला र ३ बालकले ज्यान गुमाएका छन्।
यस अवधिमा ट्राफिक नियम उल्लङ्घनका घटनासमेत उच्च रहेको कार्यालयले जनाएको छ। हालसम्म १४ हजार ३८५ सवारी साधनलाई कारबाही गरिएको छ। कारबाहीबाट एक करोड १६ लाख ३१ हजार ५०० रुपैयाँ जरिवाना सङ्कलन भएको प्रहरी निरीक्षक शाहीले जानकारी दिए।
प्रहरीका अनुसार मादक पदार्थ सेवन गरेर सवारी साधन चलाएका ४१३ जना तथा तीव्र गतिमा सवारी चलाएका ५६४ जनालाई पनि कारबाही गरिएको छ।
दुर्घटना न्यूनीकरणका लागि ट्राफिक प्रहरीले दैनिक रूपमा जिल्लाका विभिन्न स्थानमा सचेतनामूलक कार्यक्रम सञ्चालन गर्दै आएको जनाएको छ। चालक तथा सर्वसाधारणलाई ट्राफिक नियमको पालना गर्न, सुरक्षित यात्रामा ध्यान दिन तथा नियम उल्लङ्घन गर्दा हुने कारबाही र दुर्घटनाबाट हुने सम्भावित क्षतिबारे जानकारी गराउने कार्य जारी रहेको कार्यालयले उल्लेख गरेको छ।
Discussion about this post