काठमाडौं फागुन २३ गते ।
झापा जिल्लाको प्रतिनिधिसभा निर्वाचन क्षेत्र नम्बर–५ मा राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र शाह विजयी भएका छन् ।
अन्तिम मत परिणामअनुसार शाहले नेकपा (एमाले)का अध्यक्ष तथा पूर्व प्रधानमन्त्री केपी शर्मा ओलीलाई पराजित गर्दै विजय हासिल गरेका हुन् ।
निर्वाचन आयोगले सार्वजनिक गरेको अन्तिम परिणामअनुसार शाहले ६८ हजार ३४८ मत प्राप्त गरेका छन् भने ओलीले १८ हजार ७३४ मत पाएका छन् । उनीहरूबीचको मतान्तर ४९ हजार ६१४ रहेको छ ।
यसैगरी तेस्रो स्थानमा श्रम संस्कृति पार्टीका समिर तामाङले ९ हजार २३३ मत प्राप्त गरेका छन् । नेपाली कांग्रेसकी मन्दरा चिमरिया १ हजार ८२१ मतसहित चौथो स्थानमा रहिन् । राप्रपाका लक्ष्मीप्रसाद संग्रौलाले १ हजार ५३६ र नेपाल कम्युनिस्ट पार्टीका रञ्जित तामाङले १ हजार ४६१ मत प्राप्त गरेका छन् ।
अन्तिम मत परिणाम घोषणा हुनुअघि मतगणनास्थल तथा वरिपरि कडा सुरक्षा व्यवस्था गरिएको थियो । विजयी प्रमाणपत्र ग्रहण गर्न तथा विजय घोषणा कार्यक्रममा सहभागी हुन शाह मतगणनास्थल पुग्दा नेपाली सेनासहित सुरक्षाकर्मी परिचालन गरिएको थियो ।
Discussion about this post