बाँके, असार २८ गते ।
बाँकेको नरैनापुर गाउँपालिकाका मुस्लिम धर्मगुरु तथा इमामहरूले समुदायमा कुपोषण न्यूनीकरण र पोषणसम्बन्धी जनचेतना अभिवृद्धिमा सक्रिय भूमिका निर्वाह गर्ने प्रतिबद्धता जनाएका छन्।
‘जीवनका लागि पोषण’ परियोजनाअन्तर्गत बाँके युनेस्को क्लबले नरैनापुर गाउँपालिका–२ स्थित मदरसा सिराजिया इसरारुल उलूममा आयोजना गरेको पोषण अभिमुखीकरण कार्यक्रममा सहभागी धर्मगुरुले धार्मिक प्रवचन तथा समुदायस्तरीय सचेतनामार्फत पोषणसम्बन्धी सन्देश प्रभावकारी रूपमा प्रवाह गर्ने प्रतिबद्धता व्यक्त गरेका हुन्।
नरैनापुर गाउँपालिकाका स्वास्थ्य शाखा प्रमुख नगेन्द्रकुमार शाहका अनुसार अभिमुखीकरणमा सन्तुलित आहार, शिशु तथा साना बालबालिकाको उचित खानपान, समुदायमा आधारित कुपोषण रोकथामका उपाय तथा स्वस्थ पोषण व्यवहार प्रवद्र्धनका विषयमा जानकारी गराइएको थियो। पोषण परीक्षणबाट प्राप्त तथ्याङ्क प्रस्तुत गर्दै कुपोषणको जोखिममा रहेका बालबालिकाको समयमै पहिचान, स्वास्थ्य सेवामा पहुँच, आवश्यक स्वास्थ्य संस्थामा सिफारिस तथा व्यवस्थापन प्रक्रियाबारे पनि छलफल गरिएको उनले बताए।
बाँके युनेस्को क्लबका अध्यक्ष प्रवेज अली सिद्दिकीले धार्मिक अगुवाको ज्ञान र क्षमता अभिवृद्धि गर्दै उनीहरूमार्फत समुदायमा पोषणसम्बन्धी सही सन्देश पु¥याउने उद्देश्यले कार्यक्रम आयोजना गरिएको बताए। उनका अनुसार बालबालिका तथा जोखिममा रहेका परिवारमा कुपोषण रोकथामसम्बन्धी सचेतना फैलाउन इमाम तथा मौलानाको भूमिका प्रभावकारी हुने अपेक्षा गरिएको छ।
कार्यक्रममा समुदायमा पोषणसम्बन्धी सकारात्मक व्यवहार विकास, परिवारलाई पोषणमैत्री अभ्यास अपनाउन प्रेरित गर्ने उपाय तथा धार्मिक अगुवाको भूमिकाबारे पनि छलफल गरिएको थियो।
अभिमुखीकरणमा नरैनापुरका १७ जना मुस्लिम धार्मिक अगुवा (इमाम तथा मौलाना) सहभागी थिए। कार्यक्रमको सहजीकरण बाँके युनेस्को क्लबका कार्यक्रम संयोजक गुलाम गौस हलुवाईले गरेका थिए भने हेलेन केलर इन्टरनेसनल नेपालका फिल्ड अफिसर लिलबहादुर नेपालीले प्राविधिक सहजीकरण गरेका थिए। उद्घाटन पोषण सहजकर्ता अजिता कुमारी गोडियाले गरेकी थिइन् भने परियोजनाबारे बाँके युनेस्को क्लबकी कार्यक्रम संयोजक दृष्टि शाहले जानकारी दिएकी थिइन्।
Discussion about this post