बाँके, भदौ १ गते ।
लुम्बिनी प्रदेशका मुख्यमन्त्री चेतनारायण आचार्यले सोमबार प्रदेशसभाबाट विश्वासको मत लिँदै छन् । प्रदेशसभा सचिवालयका अनुसार दिउँसो १ बजे बस्ने बैठकमा उनले विश्वासको मतसम्बन्धी प्रस्ताव पेस गर्ने कार्यसूची छ ।
बैठकको सुरुवातमा प्रदेश प्रमुखको कार्यालयबाट प्राप्त पत्र सभामुखले पढेर सुनाउनेछन् । त्यसपछि मुख्यमन्त्री आचार्यले वक्तव्यसहित विश्वासको मतका लागि प्रस्ताव पेस गर्नेछन् ।
प्रस्तावमाथि प्रदेशसभा सदस्यहरूले धारणा राखेपछि मुख्यमन्त्री आचार्यले उठेका प्रश्नको जवाफ दिनेछन् । त्यसपछि सभामुखले प्रस्तावलाई निर्णयार्थ प्रस्तुत गर्नेछन् ।
नेपाली कांग्रेसले प्रदेश सरकारलाई दिएको समर्थन फिर्ता लिएपछि संवैधानिक व्यवस्थाअनुसार मुख्यमन्त्री आचार्यले विश्वासको मत लिन लागेका हुन् ।
८७ सदस्यीय लुम्बिनी प्रदेशसभामा सरकार गठनका लागि ४४ सदस्यको समर्थन आवश्यक पर्छ । मुख्यमन्त्री आचार्यले आवश्यक बहुमतभन्दा बढी सदस्यको समर्थन जुट्ने दाबी गरेका छन् ।
Discussion about this post