बाँके, भदौ ३ गते ।
बाँके राष्ट्रिय निकुञ्जलाई ‘ब्रान्डिङ’ गरी जिल्लाको पर्यटन प्रवद्र्धन गर्ने तयारी गरिएको छ। निकुञ्जको प्रचारप्रसारलाई व्यापक बनाउन नेपालगन्ज उपमहानगरपालिकासहित जिल्लाका आठवटै स्थानीय तह र अन्य सरोकारवाला निकायसँग समन्वय गरिने भएको हो।
बाँके राष्ट्रिय निकुञ्जका वरिष्ठ संरक्षण अधिकृत वीरेन्द्रप्रसाद कँडेलले निकुञ्जलाई जिल्लाको प्रमुख पर्यटकीय गन्तव्यका रूपमा विकास गर्न स्थानीय तह र सरोकारवाला निकायसँग सहकार्य गरिने बताए।
मंगलबार कोहलपुरमा भएको सरोकारवाला निकायको समन्वयात्मक बैठकले डुडुवा नाका, राँझा चोक, नेपालगन्ज विमानस्थल र कोहलपुर चौराहमा ठूला होर्डिङ बोर्ड तथा सूचना बोर्ड राखेर निकुञ्जको प्रचारप्रसार गर्ने निर्णय गरेको छ। कोहलपुर नगरपालिका, बाँके राष्ट्रिय निकुञ्ज, नेपाली सेना तथा अन्य सरोकारवाला निकायबीचको समन्वयलाई थप प्रभावकारी बनाउने निर्णयसमेत भएको कँडेलले बताए।
उनका अनुसार निकुञ्जमा पर्यटन प्रवद्र्धनका लागि आवश्यक पूर्वाधार निर्माण भइसकेका छन्। घाँसेमैदान, कृत्रिम ताल, मचान र वनपथ निर्माण गरिएकाले निकुञ्ज सफारीका लागि तयारी अवस्थामा रहेको उनले बताए।
कँडेलका अनुसार अघिल्लो आर्थिक वर्षको तुलनामा गत आर्थिक वर्षमा निकुञ्जमा सफारी गर्ने पर्यटकको संख्या करिब तेब्बरले बढेको छ।
कोहलपुर नगरपालिकाका प्रमुख पूर्णप्रसाद आचार्यले निकुञ्ज संरक्षणसँगै पर्यटन प्रवद्र्धन र स्थानीय विकासलाई जोडेर अघि बढ्न नगरपालिका सकारात्मक रहेको बताए। निकुञ्ज कार्यालयसँग सहकार्य गरेर नगरपालिकाले सचेतनामूलक कार्यक्रम गर्दै आएको उल्लेख गर्दै उनले कोहलपुरसँग जोडिएको निकुञ्जको पर्यटन प्रवद्र्धनमा नगरपालिकाले निरन्तर सहयोग गर्ने बताए।
बाँके राष्ट्रिय निकुञ्जमा पर्यटन प्रवद्र्धनका लागि निकुञ्ज कार्यालयसँगै जेडएसएल, इन्रुडेक, सामुदायिक वन उपभोक्ता महासंघलगायतका संघसंस्था पनि क्रियाशील छन्।
पाटेबाघको बासस्थान र जैविक मार्ग संरक्षण गर्ने उद्देश्यले २०६७ असार २८ गते स्थापना भएको बाँके राष्ट्रिय निकुञ्जमा पछिल्लो समय पर्यटकको आकर्षण बढ्दै गएको छ।
निकुञ्जमा आन्तरिक तथा बाह्य पर्यटकलाई लक्षित गरी पैदल मार्ग, हात्ती सफारी, होमस्टे र राप्ती नदीमा जलविहारलगायतका गतिविधिको व्यवस्था गरिएको छ। पर्यटकको बसाइलाई सहज बनाउन नेपालगन्ज र कोहलपुरमा तारे होटल तथा निकुञ्ज आसपासका क्षेत्रमा होमस्टे सञ्चालनमा छन्।
गाभर भ्याली सामुदायिक होमस्टेका अध्यक्ष कृष्ण चौधरीले निकुञ्जमा पर्यटकको आवागमन बढेसँगै आसपासका क्षेत्रमा सञ्चालित होटल तथा होमस्टेले समेत लाभ लिन थालेको बताए। उनका अनुसार निकुञ्जको प्रचारप्रसार प्रभावकारी बनाउन सके बाँकेमा पर्यटनको सम्भावना अझ विस्तार गर्न सकिनेछ।
Discussion about this post