बाँके माघ २१ गते । नेपालगन्ज उपमहानगरपालिकाले संचार नीति जारी गर्ने तयारी गरेको छ ।
मंगलबार नेपालगन्जमा अगुवा संचारकर्मीसँग नेपालगन्ज उपमहानगरपालिकाले तयार पारेको नगर संचार नीति २०७६ ड्राफ्टबारे सुझाव लिएसँगै संचार नीति जारी गर्ने तयारी गरेको हो । नागरिकको सूचना र अभिव्यक्ति स्वतन्त्रताको हकको संरक्षण गर्दै सूचना र प्रविधिको प्रयोगबाट नेपालगन्जको समग्र विकासलाई सम्वोधन गर्ने गरी संचार नीति ल्याउन लागिएको मेयर धवल शम्शेर राणाले बताउनुभयो ।
आमसन्चार माध्यम तथा संचारकर्मीको स्वतन्त्रताको संरक्षण, व्यवसायिक दक्षता विकास र संस्थागत सुदृढिकरण गर्ने गरी नीति बनाइएको मेयर राणाको भनाइ छ । मिडियालाई आधुनिकीकरण तथा व्यवसायीकरण गरी नगरको पत्रकारिता क्षेत्रको समुचित विकास लागि नीतिले सघाउ पुर्याउने उपमेयर उमा थापामगरले बताउनुभयो ।
त्यसक्रममा सहभागी अगुवा पत्रकाहरुले नीतिमा समेटिएका केही बुँदा प्रसंग विपरीत भएको भन्दै हटाउन सुझाव दिएका छन् । संचार नीतिमा स्वस्थ पत्रकारिताको विकास, प्रेस स्वतन्त्रताको रक्षाका लागि नगर मिडिया काउन्सिल गठन गर्ने नीति हटाइनु पर्ने माग गरेका छन् । केन्द्रमै मिडिया अनुगमन गर्ने र कारवाही गर्ने प्रेस काउन्सिल हुँदा हुँदै उपमहानगरपालिकामा पनि नगर मिडिया काउन्सिल गठन गर्नु उपयुक्त नहुने अगुवा पत्रकारकाहरुको सुझाव छ ।
संचार नीतिका नाममा अभिव्यक्ति स्वतन्त्रतालाई कुण्ठित गर्ने प्रावधान स्विकार्य नहुनेमा पत्रकारहरुको सुझाव छ । कार्यक्रममा पत्रकारहरु नीरज गौतम, जे पाण्डे, पूर्णलाल चुके, शरण कर्माचार्य, ठाकुरसिंह थारु, चेतकान्त भट्टराई, प्रियास्मृति ढकाललगायतले सुझाव दिनुभएको थियो ।
Discussion about this post