बाँके फागन ६ गते ।
बाँकेको जानकी गाउँपालिकामा १२ औं राष्ट्रपति रनिङ्ग शिल्ड तथा दोस्रो गाउँपालिका अध्यक्ष कप प्रतियोगिता आजबाट शुरु भएको छ । प्रतियोगिताको उद्घाटन कार्यक्रममामा बोल्दै प्रदेशसभा सदस्य बाबुराम गौतमले गाउँपालिका स्तरबाटै खेलकुदलाई प्राथमिकताका साथ बजेट विनियोजन गर्नुपर्ने बताए । उनले विद्यार्थी क्षमता बृद्धिका लागि खेलकुद प्रतियोगिता अति आवश्यक रहेको उल्लेख गरे । मानव सभ्यताको सर्वोपरी शिक्षा भएको प्रसंग जोड दिए । उनले समाजलाई अगाडि बढाउन सक्ने व्यवहारिक र गुणस्तरिय शिक्षा प्रदान गर्नतर्फ शिक्षकहरुले ध्यान दिन आग्रह गरे । शिक्षा देश विकासको पहिलो खुड्किलो पनि भएका ेले स्थानीय सरकारले यसलाई प्राथमिकता दिनुपर्ने उनको भनाई रहेको छ । गाउँपालिका अध्यक्ष रामनिवास यादवले जानकी गाउँपालिकाले भौतिक पूर्वाधार सँगसँगै शिक्षा, स्वास्थ्य र सामाजिक विकासमा पनि ध्यान दिएर काम गरेको बताएका छन । उनले शिक्षाको अवस्था सुधार्न योजनावद्ध रुपमा अभियान सञ्चालन गरिएको समेत जानकारी दिए । सो कार्यक्रममा गाउँपालिका उपाध्यक्ष भूमिसरा धिताल, जिल्ला शिक्षा विकास समन्वय इकाईका प्रमुख रामसुरेश यादव, बाँके जिल्ला खेलकुद विकास समितिका अध्यक्ष आतङ्क बस्नेत लगायत ले मन्तव्य व्यक्त गरेका थिए । ३ दिनसम्म सञ्चालन हुने प्रतियोगितामा आज प्रावि स्तरका खेलकुद भएका छन् । प्रतियोगितामा ५ मावि र २५ आधारभूत तहसम्मका विद्यालय गरी ३० विद्यालयका विद्यार्थीले भाग लिएको गाउँपालिकाका अधिकृत भलाराम पङ्गालीले जानकारी दिए ।
Discussion about this post