खोजखबर संवाददाता
बाँके साउन २६ गते । क्यान्सरबाट पीडित भै उपचार गराइ रहनु भएका वरिष्ठ पत्रकार रेशम विरहीको उपचार सहयोगका लागि नेपाल पत्रकार महासंघले शुरु गरेको सहयोग संकलन अभियान अन्तरगत नेपालगन्ज उपमहानगरका मेयर डा. धवल शमशेर राणाले ५० हजार रुपैयाँको चेक हस्तान्तरण गर्नु भएको छ ।
नेपालगन्जका वरिष्ठ पत्रकार उदयसिंह श्रेष्ठले ११ हजार १ सय ११ रुपैयाँ सहयोग गरेर शुरुवात गर्नु भएको सहयोग संकलन अभियानलाई पत्रकार महासंघ बाँकेले निरन्तरता दिएको छ । सो अभियान अन्तरगत मेयर डा. राणाले आफुले पाउने पारिश्रमिकबाट डेढ महिनाको तलब बराबर ५० हजार सहयोग गर्नु भएको हो ।
नेपाल पत्रकार महासंघको कार्यालयमा आयोजना गरिएको एक औपचारिक कार्यक्रमका बिच मयेर राणाले पत्रकार महासंघ बाँकेका अध्यक्ष ठाकुरसिंह थारुलाई ५० हजारको चेक हस्तान्तरण गर्नु भयो ।
सो अवसरमा बोल्दै डा. राणाले वरिष्ठ पत्रकार विरहीलाई सहयोग गर्न पाउँदा निकै खुशी लागेको बताउनु भयो । उहाँले आफुले शुरुबाटै घोषणा नै गरेर आफ्नो तलब भत्ताको रकम गरिब असहाय, विपन्न र विरामीहरुलाई प्रदान गर्दै आएको बताउनु भयो ।
सो क्रमलाई निरन्तरता दिने जनाउँदै उहाँले अति आवश्यक परेकाहरुलाई भविष्यमा पनि सहयोग गरिरहने बताउनु भयो ।
सो अवसरमा बोल्दै पत्रकार महासंघ बाँकेका अध्यक्ष थारुले बाँकेमा रहेर लामो समय पत्रकारिता गर्नु भएका विरहीलाई सहयोग गर्न रकम संकलन गरिरहेको जनाउँदै हालसम्म करिब २ लाख रुपैयाँ सहयोग संकलन भैसकेको जनाउनु भयो ।
पत्रकार उदयसिंह श्रेष्ठले शुरुवात गरेको अभियानलाई महासंघले निरन्तरता दिएको जनाउँदै अध्यक्ष थारुले आवश्यक परेमा अझै थप रकम समेत संकलन गर्ने बताउनु भयो ।
सो अवसरमा पत्रकार डक्ट धितालले ११ हजार, जावेद अन्सारीले ५ हजार नगद प्रदान गर्नु भएको थियो । कार्यक्रममा वरिष्ठ पत्रकारहरु पूर्णलाल चुके, उदयसिंह श्रेष्ठ, सिराज खान लगायतको पनि सहभागिता रहेको थियो ।
Discussion about this post