बाँके माघ १२ गते ।
बाँकेको राप्तीसोनारी गाउँपालिका–१ सौरीमा प्रहरीसँगको सेटिङमा गोरु तस्करको योजना विफल भएको छ । पूर्वपश्चिम राजमार्ग अन्तर्गत पर्ने सौरीमा सडकको छेउमै ना ६ ख १००३ नम्वरको ट्रकमा आइतवार राती पौने १० बजेतिर तस्करहरुले गोरु लोड गरिरहेका थिए । लोड भइरहेकोबारे सूचना स्थानीयले चुहाइदिएपछि इप्रका कुसुमका इन्चार्ज श्याम अर्यालको सेटिङमा भइरहेको गोरु तस्करको योजना विलफल भएको हो ।
सडक छेउका रुखमा तस्करहरुले १४ वटा गोरु बाँधेका थिए । तीनवटा लोड भइसकेको थियो । बाँकी लोड भइरहेको अवस्थामा ट्राफिक प्रहरी पुगे । स्थानीय तस्करहरुले अरु गोरुलाई डोरी फुकाएर भगाए र आफु पनि भागे । गोरु तस्कर भइरहेको बाँकेका सिडियो रामबहादुर कुरुम्वाङलाई राती नै जानकारी भएपछि उनले तत्काल एसपी ओम रानालाई फोन गरेर नियन्त्रण गर्न निर्देशन दिए । एसपी रानाले तत्काल अर्याललाई फोन गरेपछि उनी करिव डेढ घण्टा पछि मात्रै गोरुलोड गर्ने स्थल पुगेका थिए । तर अर्यालले भने आफु पौने १० बजे नै घटनास्थल पुगेको दावी गरेका छन् ।
तर उनी ११ बजेको आसपासमा मात्र पुगेका थिए । जवकी घटनास्थल इप्रकाभन्दा करिव दुई किलोमिटरको दूरीमा छ । इन्चार्जको जिम्मेवारी पाएको महिना दिन नपुग्दै अर्याल स्थानीय तस्करसँगको साँठगाँठमा कमाउधन्दामा लागेका छन् । इप्रकाका प्रहरी हवल्दार दुर्गा महराले दुई दिनअघि स्थानीय तस्करहरुसँग सेटिङ मिलाएका थिए । महरालाई विश्वासमा लिएर इप्रका कुसुमका इन्चार्जको कमाण्ड सम्हालेको महिना दिन नवित्दै प्रहरी नायव निरीक्षक अर्याल कमाउधन्दामा लागेका हुन् । तस्करहरुले ती गोरु कुसुम आसपासबाटै खरिद गरेका थिए । एउटा गोरु एक हजारदेखि २ हजारसम्ममा खरिद गरेको पाइएको छ ।
प्रहरी हवल्दार महराले इन्चार्ज अर्याललाई सेटिङको सबै तवरतरिका जाहेर गरेका थिए । त्यहीअनुसार तस्करहरुले कुसुम बजारदेखि करिव दुई किलोमिटरकै दूरी र सडकछेउबाटै गोरुलोड गर्ने हिम्मत जुटाएका थिए । ‘ती गोरु सौरीबाट निर्यात गर्न सकेको भए करिव डेढ लाख आउथ्यो स्थानीय तस्करले भने–‘त्यही रकम इन्चार्ज अर्याल, हवल्दार महरा र हामीबीच भागबन्डा गर्ने योजना थियो तर कस्ले सूचना चुहाइ दिएछ चौपट्ट भयो ।’ अर्यालले भने यसमा आफ्नो कुनै साँठगाँठ नभएको दावी गरेका छन् । गोरु कहाँ लैजान लागिएको थियो भनेर प्रश्न गर्दा अर्यालले आनाकानी जवाफ दिदै भने बुटवलको चालक हो त्यतै लाने होला । ‘
बाँकेका सिडियो कुरुम्वाङले स्थानीय प्रहरीसँगको सेटिङमा गोरु तस्कर भइरहेको बताए । ‘गोरु तस्कर भइरहेकै छ उनले भने–‘स्थानीय प्रहरी चौकीका केही पनि संलग्न भइरहेको भन्ने आइरहेको छ उनीहरुमाथि निगरानी बढाइरहेका छौ ।’ उनले कानुन विपरीत काम गर्नेलाई कारवाहीको दायरामा ल्याउने चेतावनी दिएका छन् । ट्रक र चालक इप्रका कुसुमकै नियन्त्रणमा छन् ।बाँकेका एसपी ओम रानाले केही प्रहरीलाई तस्करहरुले प्रभावमा पार्ने काम गरेको गुनासो आइरहेको बताए । उनले त्यस्ता व्यक्तिहरुको पहिचान गरी दोषी देखिए कारवाही गर्ने बताए ।
Discussion about this post