बाँके असोज २९ गते । बाँकेको कालाबन्जडमा फौजी किराले पोकेको धान खेती नोक्सान पुर्याए पछि किसानहरु निराश बनेका छन् । डुडुवा गाउँपालिका—६ कालाबन्जडमा करिब सय हेक्टर बढी जमिनमा लगाईएको धान खेतीमा ५ दिन देखि फौजी किराले नोक्सान गर्दै आएको हो । फौजी किराले रातीको समयमा धानको बाला काटेर खाईदिने गरेपछि किसानहरुले लगाएको धानबाली दिन प्रतिदिन नोक्सान हुदै गएको छ । शुरुमा थोरै धान खेतीमा देखा परेको फौजी किरा ५ दिन मै फैलिएर सय बढी हेक्टर जमिनमा लगाएको धान खेतीमा नोक्सान पुर्याइसकेको छ ।
४० कठ्ठा जमिनमा लगाएको राधा—४ धान फौजी किराले काटेर नोक्सान पुर्याएको डुडुवा—६ कालाबन्जडका किसान रतिराम कुम्हारले बताए । उनले यस बर्ष धान निकै राम्रो भएको बताउदै एक कठ्ठामा साढे २ क्विन्टल धान फल्ने अनुमान गरेको बताउदै फौजी किराले धान सखाप पारेपछि उत्पादन शुन्य रहने भन्दै कुम्हारले जीवन धान्न गार्हो हुने बताए ।
४० कठ्ठा जमिनमा लगाएको राधा—४ धान खेती फौजी किराले रातीको समयमा काटेर नोक्सान पुर्याएको किसान मोहरीलाल मौर्यले बताए । उनले फौजी किराको प्रकोपले किसानलाई धेरै क्षती पुर्याएको बताउदै फौजी किरा नियन्त्रणका लागी बिभिन्न संघ संस्था र सरकारलाई सहयोग गरिदिन आग्रह गरे ।
धान खेती गर्दा धेरै मेहनत गरेको बताउदै किसान अफिद अलीले फौजी किराले धान काटेर ठूलो नोक्सान बनाएको बताए । उनले १ बठ्ठाबाट ५ किलो धान घरमा भित्रिने अवस्था नरहेको बताए ।
१४ कठ्ठामा लगाएको धान फौजी किराले काटेर नोक्सान पुर्याएको किसान जुमै दर्जीले बताए । उनले १९ गते देखि कृषि ज्ञान केन्द्रमा सम्पर्क गर्दा दशै पर्वले कोही पनि कर्मचारी आउन नसकेको गुनासो ब्यक्त गरे ।
फौजी किराले अत्यन्तै छिटो नोक्सान पुर्याउने कृषि ज्ञान केन्द्रका प्रमुख सागर ढकालले बताए । उनले हालै मात्र धानवालीमा देखिएको बताउदै फौजी किरा प्रभावित क्षेत्रमा छिट्टै पुग्ने र तत्काल रोकथाम र नियन्त्रणका लागी किसानहरुलाई बिषादी सहयोग गर्नुका साथै रोकथामका उपायहरुको जानकारी दिने बताए । बाँके जिल्लाको नेपालगन्ज उपमहानगरपालिकाको १९ नंम्बर वडा, राप्तीसोनारी गाउँपालिकाका केही वडा र डुडुवा ६ कालाबन्जडमा फौजी किराको प्रकोप फैलिएकाले कृषि ज्ञान केन्दको तर्फबाट प्रभावित क्षेत्रमै पुगेर अवलोकन गरी किसानहरुलाई बिषादीको सहयागे गर्ने प्रमुख ढकालले जानकारी दिए ।
बर्ष दिन छाक टार्नका लागी लगाईएको धान खेती एका एक फौजी किराले नोक्सान पुर्याए पछि किसान निराश बनेका छन् । थप नोक्सान हुन नदिन फौजी किरा नियन्त्रणका लागी सम्बन्धित निकाय चनाखो हुन जरुरी छ । धान खेती नोक्सान भएका किसानको क्षतिपूर्तिको ब्यबस्था स्थानीय सरकारले पहल गर्नु पर्ने आवश्यकता छ र अरु किसानहरुको धान खेती बचाउनका लागी सम्बन्धित निकायले तत्काल पहल गर्न जरुरी छ ।
Discussion about this post