बाँके मंसिर १२ गते ।
बालिका हत्यामा संलग्न एकजनालाई जिल्ला अदालत बाँकेले पुर्पक्षका लागि कारागार चलान गरेको छ । भारत बहराईच थाना रुपैडिया तहशिल नानपारा ग्राम बाबागन्ज बस्दै आएका ३० वर्षीय महेश चौहानलाई जिल्ला अदालतले पुर्पक्षका लागि कारागार चलान गरेको जिल्ला प्रहरी कार्यालय बाँकेका सूचना अधिकारी नारायण डाँगीले जानकारी दिए ।
उनी हाल गुलरिया गाँउ स्थित ससुराली घरमा वस्दै आएको पाइएको छ । डुडुवा गाउँपालिका १ टेपरीकी १४ वर्षीया बालिका रीता हरिजन भन्ने सीलावती चमारको शव कार्तिक १४ गते राम कुमार बाहुनको खेतमा गाडेको अवस्थामा फेला परेको थियो । चौहानले वाहुनको खेत ट्याक्टरले जोत्ने क्रममा खेतमा गाडिएको अवस्थामा अन्दाजी १२ वर्षीया वालिकाको शव फेला परेको भनि सूचना प्रहरीलाई पुगेको थियो ।
उक्त ट्याक्टर चौहान आफैले चलाएका थिए । त्यसपछि तत्काल जिल्ला प्रहरी कार्यालयबाट खटिएको प्रहरी टोली घटनास्थलमा गई घटनाको अनुसन्धान सुरु गरेको थियो । मृत अवस्थामा फेला परेकी बालिका सोही ठाउँ बस्ने श्यामलाल चमारको छोरी १४ वर्षीया रीता पुष्टि भएपछि प्रहरीले चौहानमाथि शंका गर्दै नियन्त्रणमा लिएको थियो ।
‘थप अनुसन्धानको क्रममा मृतक बालिकालाई चौहानले नै कर्तव्य गरी मारेको खुल्न आई सोही अनुसार अनुसन्धान प्रतिवेदन जिल्ला सरकारी वकिल कार्यालय बाँकेमा पेश गरिएकोमा सोमवार बाँके जिल्ला अदालतको आदेशले उनलाई पुर्पक्षमा कारागार कार्यालय बाँकेमा पठाएको छ’ सूचना अधिकारी डाँगीले भने । उनलाई मुलुकी फौजदारी संहिता २०७४ को दफा १७७ बमोजिम जन्म कैद हुन सक्ने कानुनी व्यवस्था छ ।
Discussion about this post