बाँके मंसिर २८ गते ।
बाँके प्रहरीले दुई लाख १९ हजार रुपैयाँको अवैध सामान बरामद गरेको छ । जिल्ला प्रहरी कार्यालयबाट खटिएको प्रहरी टोलीले नेपालगन्ज उपमहानगरपालिका १८ भाटभटेनी नजिकबाट बेवारिसे अबस्थामा रहेको अवैध सामान बरामद गरेको हो ।
भारतबाट भन्सार छलेर ल्याएको बिभिन्न कम्पनीका दुई लाख १९ हजार रुपैयाँ बराबरको सामान फेला पारी बरामद गरेको बाँके प्रहरी प्रवक्ता डिएसपी नारायण डाँगीले जानकारी दिए । बरामद भएको उक्त सामान आवश्यक कारवाहीका लागि नेपालगन्ज भन्सार कार्यालय पठाइएको बताए ।
बाँके प्रहरीले भारतबाट अवैध रुपमा भित्रिएका सामान धमाधम बरामद गर्न थालेपछि अवैध सामान ओसार पसार नियन्त्रणका लागि नाकामा खटिएको सशस्त्र प्रहरीको कामकाज प्रति आशंका उब्जिएको छ । नेपाल–भारत सीमाको हरेक पाँच सय मिटरको दूरीमा सशस्त्र प्रहरीले ड्यूटी दिए पनि अवैध सामान भित्रिनु सशस्त्र प्रहरीको तस्करसँग मिलोमतो छ भन्ने प्रष्ट हुन्छ,’ नेपालगन्जका एक ब्यापारीले भने ।
सशस्त्र प्रहरीको घुमुवा असई सोमराज शर्माको नेतृत्वमा खटिएको घुमुवा टोलीले तस्करसँग पैँसा खाएर सामान भित्र्याउन सहयोग गरिरहेको खुलासा भएको छ । उनले ड्यूटीमा रहेका सशस्त्र प्रहरीलाई तस्करको नाम र ल्याउने सामानको सूचना दिने गरेका छन् । ‘तस्करले ड्यूटीमा रहेका सशस्त्र प्रहरीलाई तस्करले सोमराज शर्माको नाम भन्ने वित्तिकै छाड्ने गरेको एक प्रत्यक्षदर्शीले बताए । ‘सोमराज र एसपीको मिलोमतोमा तस्करले सामान ल्याउने भएकोले उनको नाम लिने वित्तिकै ड्यूटीमा रहेका सशस्त्रले सामान छाडि दिन्छन्,’ एक प्रत्यक्षदर्शीले भने ।
शर्मासँग सेटिङ मिलाएका तस्करको सामान निर्वाध रुपमा आए पनि घर खर्चका लागि सर्वसाधारणले ल्याउने सामानमा भने सशस्त्र प्रहरीले कडाई गर्दै आएको छ । एक प्रत्यक्षदर्शीले भने, ‘सशस्त्र प्रहरीले सानालाई सास्ती, ठूलालाई मस्ती उखान जस्तै ब्यवहार गर्दै आएको छ । नियम लगाउने हो भने सवैलाई समान गर्नु पर्यो,’ रुपइडिहाबाट आउँदै गरेका एक सर्वसाधारणले भने ।
Discussion about this post